సరికొత్త చీర ఊహించినాను.. ~ పాటతో నేను

శనివారం, ఫిబ్రవరి 08, 2014

సరికొత్త చీర ఊహించినాను..

శనివారం, ఫిబ్రవరి 08, 2014 వేణూశ్రీకాంత్ 5 వ్యాఖ్యలు

Painting by Rajdev

పెళ్ళిపుస్తకం సినిమా ఇప్పటికి ఎన్ని సార్లు చూసి ఉంటానో ఇంకా ముందు ముందు ఎన్నిసార్లు చూడబోతానో లెక్కేలేదు. నా టీనేజ్ చివరిదశలో చూశానేమో మనసులో అలా ముద్రించుకు పోయింది. బుడుగు తప్ప ముళ్ళపూడి వారి సాహిత్యం గురించి పెద్దగా పరిచయంలేని సమయంలో బాపురమణలిద్దరినీ దేవుళ్ళుగా ఆరాధించవచ్చు అని అనిపించిన సినిమా. ఇందులో ఇల్లు, పెరడు, ఆ మొక్కల మధ్య అరుగు నాకు ఎంత ఇష్టమో మాటల్లో చెప్పలేను.

కొత్త దంపతులకి ఇవ్వగలిగిన అపురూపమైన బహుమతులలో ఒకటిగా శాశ్వతమైన స్థానాన్ని సంపాదించిన సినిమా. ఈ సినిమా విడుదలయ్యాక ఇందులోని "శ్రీరస్తూ శుభమస్తూ" అన్న పాట నేపధ్యంగా వాడని పెళ్ళి వీడియో ఆంధ్రాలో లేదనడం అతిశయోక్తి కాదు. ఇందులోని "సరికొత్త చీర" పాట దానికి ముందు సన్నివేశంలో హీరో పెళ్ళి గురించి చెప్పే మాటలు నాకు చాలా ఇష్టం. మీరూ ఆస్వాదించండి. పాట ఆడియో మాత్రమే కావాలంటే ఇక్కడ వినవచ్చు లేదా ఇక్కడ డౌన్లోడ్ చేస్కోవచ్చు.

"అమ్ముకుట్టీ.. నీకు కోపం వచ్చింది కన్నీళ్ళు కదిలాయ్.. నాకు గర్వంగా ఉంది, ఇంత గట్టి పెళ్ళాం దొరికినందుకు. ఇంత మంచి ఫ్రెండ్ ని కాదని నేను మరో పిల్లకేసి చూసినా... ఒకవేళ చూస్తే నవ్వితే షేక్ హ్యాండిస్తే.. అది నా ఉద్యోగ ధర్మం అని నీకు తెలియదా.. గుండెల్లో గూడు కట్టుకున్న ప్రేమనీ చీటికీ మాటికి పైకి చెప్పుకుంటామా..

అమ్ముకుట్టీ.. పెళ్ళంటే పాలల్లో పాలలా కలిసిపోవడం పంచదారలా కరిగిపోవడం పెళ్ళంటే నమ్మకం, ఆ నమ్మకం తిరుగులేనిది.. అదీ దీపం లాంటిది దానిమీద అనుమానపు నీడలు పడవు... అనుమానం ఉన్నచోట నారాయణ అన్నా బూతులా వినిపిస్తుంది నమ్మకం ఉన్న చోట బూతుకూడా నారాయణ అన్నట్లే వినిపిస్తుంది..."

--ముళ్ళపూడి వెంకట రమణ.