రుక్మిణీ కళ్యాణం హరికథ

హరికథా ప్రక్రియపై నాకున్న మక్కువ మీ అందరికీ తెలిసినదేగా ముఖ్యంగా సినిమాల్లో వచ్చే హరికథలంటే నాకు మరీ ఇష్టం. సూత్రధారులు సినిమాలోని ఈ రుక్మిణీ కళ్యాణ హరికథ కూడా బాగుంటుంది. సాథారణంగా కథకులుగా మగవాళ్ళనే చూస్తుంటాం అయితే ఈ సినిమాలో రొటీన్ కి భిన్నంగా కె.విశ్వనాధ్ గారు కె.ఆర్.విజయ గారితో హరికథ చెప్పించారు. ఆవిడ ఆహార్యానికి తగినట్లుగా సుశీల గారు నేపధ్యగానం చేశారు, కనులు మూసుకుని కథ వింటూంటే సన్నివేశాలు (సినిమాలోవి కాదు రుక్మిణీ కళ్యాణంలోని సన్నివేశాలు) కళ్ళముందు సాక్షాత్కరించేస్తాయి. 

ఈ పాటను రాసినది మాడుగుల నాగఫణి శర్మ గారన్న విషయం ఈరోజే దీని గురించి వెతుకుతుంటే తెలిసింది. ఇవికూడా ఏవైనా పద్యాలలోవేమో తెలియదు కానీ ప్రాసతో కూడిన కొన్ని కొన్ని పదప్రయోగాలు చాలా ఆకట్టుకుంటాయి. కె.వి.మహదేవన్ గారి బాణి గురించి నే చెప్పగలిగినదేముంది అద్భుతమనే మాట తప్ప. ఈ హరికథను మీరు ఇక్కడ వినవచ్చు ప్లే లిస్ట్ లో మొదటినుండి ఐదవ పాట “శ్రీరస్తూ శుభమస్తూ” అనే టైటిల్ తో ఉంటుంది.  

చిత్రం : సూత్రధారులు

సంగీతం : కె.వి.మహదేవన్

సాహిత్యం : మాడుగుల నాగ ఫణి శర్మ

గానం : సుశీల, ఎస్. పి. పల్లవి

శ్రీమద్ గజాననం నత్వా

స్తుత్వా శ్రీ సత్య సాయినమ్

శ్రీ హరికథా పితామహమహమ్ వందే..

నారాయణ దాస సద్గురుమ్.

శ్రీరస్తూ... శుభమస్తూ...

శ్రీరస్తు శుభమస్తు

సత్కథాలహరికీ.. హరికీ ..

ఆగమలతల కొసల విరిసినా విరికి... హరికీ

కోటి కొంగుల ముడుల పుణ్యంబు సిరికీ... హరికీ

సిరికీ... హరికీ.. శ్రీరస్తు శుభమస్తు

యత్ర శ్రీకృష్ణ సంకీర్తనమ్..

తత్ర శుభమంగళ సంవర్తనమ్... అని ఆర్యోక్తి..

అలాంటి సర్వమంగళ మోహనాకారుడైన శ్రీకృష్ణుడి అనేకానేక లీలా వినోదములలో... రుక్మిణీ కల్యాణ సత్కథా మధురాతి మధురమైనది.. అందలి నాయికామణి...

ఆ రమణీ..

లలిత పల్లవపాణి నీలసుందరవేణి...

అందాల పూబోణి... ఆ రుక్మిణీ...

అందాల పూబోణి... ఆ రుక్మిణీ...

కనులవి తెరచిన చాలు.. యదునందను అందమె గ్రోలూ

కరములు కదలిన చాలు.. కరివరదుని పదముల వ్రాలు

పెదవులు మెదిలిన చాలు.. హరిజపముల తపములదేలు

ఉల్లమంతా నల్లనయ్యే.. వలపు ఓపని వెల్లువయ్యే..

అంతలో..

యదుకేసరితో హరితో గిరితో

మన వియ్యము గియ్యము కూడదని

శిశుపాలుని పాలొనరింతునని

తన సోదరుడాడిన మాటవినీ..

దిగులుగొనీ.. దిక్కెవ్వరనీ.. 

తలపోసి తలపోసి తెలవారగా..

తనువెల్ల తపనలో తడియారగా..

తలపోసి తలపోసి తెలవారగా..

తనువెల్ల తపనలో తడియారగా..

ప్రళయమే రానున్నదని ఎంచెను..

ప్రణయ సందేశమాస్వామీ కంపెనూ..

ఆ లలిత పల్లవపాణి.. నీల సుందర వేణి..

అందాల పూబోణి ఆ రుక్మణీమణికి..

శ్రీరస్తు శుభమస్తు..

శ్రీరస్తు శుభమస్తు.

అగ్రజుడైన రుక్మి తన పంతమే తనదిగా

శిశుపాలునికిచ్చి వివాహము జరిపింప నిశ్చయింపగా

ఆ చిన్నారి రుక్మిణీ.. 

రానన్నాడో... తానై రానున్నాడో...

ప్రభువు ఏమన్నాడో.. ఏమనుకున్నాడో

అని మనసున విలవిలలాడు తరుణంబున

అది గ్రహించని చెలికత్తెలా రుక్మిణీదేవికీ...

తిలకము దిద్దిరదే... కళ్యాణ తిలకము దిద్దిరదే

చేలముగట్టిరదే... బంగారు చేలముగట్టిరదే

బాసికముంచిరదే... నుదుటను బాసికముంచిరదే

పదములనలదిరదే... పారాణి పదములనలదిరదే...

పారాణి పదములనలదిరదే...

ఇవ్విదమ్మున అలంకరింపబడిన రుక్మిణిదేవీ...

శిలపై అశువులుబాయు బలిపశువు చందంబున...

అందంబును ఆనందంబును వీడి...

డెందంబున కుందుచుండగా...

అదిగో వచ్చెను వాడే హరి శ్రీహరీ

అదిగో వచ్చెను వాడే హరి శ్రీహరీ

శ్రీరుక్మిణీ హృదయప్రణయాక్షరీ

అదిగో వచ్చెను వాడె...

వచ్చీ వైరుల ద్రుంచి.. వరరత్న మై నిల్చి

వనితా మనోరధము దీర్చీ.. రథము బూన్చి

జయవెట్ట జనకోటి.. వెడలే రుక్మిణి తోటి

అదిగో అదిగో వాడే హరి శ్రీహరి..

స్వస్తి ప్రజాభ్య పరిపాలయంతా...

న్యాయేన మార్గేన మహిమ్ మహీశాః...

గోబ్రాహ్మణేభ్య శుభమస్తు నిత్యమ్

లోకా సమస్తా సుఖినో భవంతు...

 

పూర్తిగా చదువు

గణనాథా సేవించెదమయ్యరో (హరికథ)

దేవస్థానం సినిమాలోని మరో హరికథ ఇది. కథ లోనే చెప్పినట్లు ఇది హరికథ, అంటే కేవలం శ్రీహరిని స్తుతించేది మాత్రమే కాదు మన కష్టాలనూ బాధలనూ హరించే తరుణోపాయం చెప్పే కథా అని మనం అర్ధం చేసుకోవాలి. ప్రస్తుత జనరేషన్ కి చాలా ఆవశ్యకమైన సలహాలను ఇస్తూ మాదకద్రవ్యాలకు అలవాటుకాకుండా ఎలా నిగ్రహించుకోవాలీ పెరుగుతున్న టెక్నాలజీ వెసులుబాట్లను ఎలా సమర్ధవంతంగా ఉపయోగించాలో తెలియజేస్తూ సాగే ఈ కథను స్వరవీణాపాణి రచించి స్వరపరిస్తే బాలుగారు ఆలపించారు. మీరూ ఇక్కడ విని ఆనందించండి.

మిత్రులందరికీ సంక్రాంతి శుభాకాంక్షలు. 

 

చిత్రం : దేవస్థానం
సాహిత్యం : స్వరవీణాపాణి
సంగీతం : స్వరవీణాపాణి
గానం : SP బాలు

గణనాథా సేవించెదమయ్యరో.. విఘ్నాలను మాపే మా అయ్యరో..
ఓరయ్య గణపయ్యా.. మముగావగ రావయ్యా..
నిను నమ్మిన బంటులమయ్యా మాతో ఉండయ్యా..
మాతో ఉండయ్యా.. మాతో ఉండయ్యా...

భక్తమహాశయులారా ఇది హరికథ, అంటే కేవలం శ్రీహరిని స్తుతించేది మాత్రమే కాదు మన కష్టాలనూ బాధలనూ హరించే తరుణోపాయం చెప్పే కథా అని మనం అర్ధంచేసుకోవాలి. ప్రపంచంలో సుమారు ముప్పై కోట్లమంది మనదేశంలో సుమారు ఏడున్నరకోట్లమంది మాదక ద్రవ్యాల మహమ్మారి  విషకోరలలో చిక్కుకుని విలవిలలాడిపోతున్నారూ.. దీనికి కారణం మనో నిగ్రహం కోల్పోవడమే.. చలించని మనోనిగ్రహం మనిషికి ఎంత అవసరమో మన పురాణాల్లో ఎంతో స్పష్టంగా చెప్పబడింది. 

ఇహ కథ మొదలుపెడదాం..
ఒక్కసారిగా అందరూ జై రమా రమణ గోవిందో హారి..
శ్రీరాముడు దండకారణ్యంలో సీతా లక్ష్మణులతో వనవాసం చేస్తూ ఉండగా అటుగా వెళ్తున్న రావణాసురుడి చెల్లెలు శూర్పణఖ...

సుందరాంగుడగు రాముని జూడగ మనోనిగ్రహము వీడే..
సొగసులొలికించి హొయలు కురిపించి ఆతని పొందును కోరే...
అప్పుడు ఏం జరిగిందయ్యా అంటే..
నీలమేఘ శ్యాముడూ మనోనిగ్రహ ధీరుడూ..
సకల గుణాభిరాముడూ.. ఏకపత్నీ సచ్ఛీలుడూ..
వలదు వలదంచు నీతి వాక్యముల శూర్పణఖను వారించే..
ముందు జరుగబోవు దుష్కర్మల తెలిసి నిగ్రహము వహియించే..

భక్తులారా ఈ విషయాన్ని మనం శ్రద్దగా గమనిస్తే.. మనో నిగ్రహం వీడి శూర్పణఖ లంకావినాశనానికి కారణమైతే శ్రీరాముడు మనోనిగ్రహంతో ఎన్నో కష్ట నష్టాలను తన ధర్మాయుధంతో జయించి మనందరికీ దేవుడైనాడు. అయ్యా విశ్వవిజేత నేటిమానవుడు ప్రస్తుతం ఎలా ఉన్నాడయ్యా అంటే.. 

ఎదిగినకొద్దీ ఒదిగుండాలనే..
ఎదిగినకొద్దీ ఒదిగుండాలనే మాటను అటకెక్కించాడూ..
తనకు తానుగా విర్రవీగి తన పతనాన్ని స్వాగతించాడూ..
కొకైన్ హెరాయిన్ గుట్కా జర్దా కనుగొని సుఖమని మురిసాడూ..
ఊపిరితిత్తుల మూత్రపిండముల గుండెజబ్బులను పెంచాడూ..
మృత్యువుతో ఆటాడీ ఓడీ త్వరగా కాటికి నడిచాడూ..

మత్తులో ఊగుతూ తూగుతూ సర్వం కోల్పోతూ మాదక ద్రవ్యాలకు బానిసలుగా మారిన వారిని మనం ఎలా కాపాడుకుందామయ్యా అంటే..
మత్తుకు బానిస కావద్దు.. గమ్మత్తుగ ఉందని మురియొద్దు..
మనోనిగ్రహం వీడొద్దూ.. అకాల మృత్యువును కోరద్దూ..
నీ కుటుంబ బాధ్యత మరవొద్దు.. నీ బ్రతుకునూ బుగ్గిగా మార్చొద్దూ..
సహృదయలందరూ గాట్టిగా ఓకసారి జై రమా రమణ గోవిందో హారి..
 
మరో కోణంలో మానవునిలోని విఙ్ఞానమనే వెర్రితలలు అఙ్ఞానాన్ని ఎలా పెంచుతున్నాయయ్యా అంటే..
కంప్యూటర్ తోనే కాపురమే చేస్తూ ఇంటర్నెట్ అంటూ ఇంటిని వదిలేస్తూ..
సెల్ ఫోన్ మీటింగులతో.. యువత నాశనమైపోతుంటే..
మనసు మమత మమకారం మరచిపోతుంటే..
తనకు తానే శత్రువై ప్రశాంతి లేక విలపిస్తుంటే..

మరి అలాంటి వాళ్ళు ఎలా బాగుపడాలయ్యా అంటే..
అవసరానికే సెల్ ఫోన్ అత్యవసరానికే లాప్ టాప్
విఙ్ఞాన గని లాగ ఇంటర్నెట్ ను వాడాలీ...
యోగా ధ్యానం దైవ చింతనం చేయాలీ..
అన్యోన్య ప్రేమానురాగ జీవితం గడపాలీ..
మనిషిగ బ్రతకాలీ.. ముందుకు సాగాలీ..

భక్తులారా ఇప్పటిదాకా మీరు ఎంతో శ్రద్దగా విన్న విషయాల్ని చిత్తశుద్దితో ప్రపంచం ఆచరిస్తే
ఆనందమే మహానందమే ఈ ప్రపంచానికీ మానవజాతికి ఆనందమే మహానందమే

జై ఆరోగ్యప్రదమైన ప్రపంచానికీ జై..
జై శాంతిసామరస్య ప్రదమైన ప్రపంచానికీ జై..
శుభం శుభం స్వస్తి.  

పూర్తిగా చదువు

గుణనుతి చేతును (హరికథ)

ఇది హరికథ కాదు అంటే హరిని గురించిన కథకాదు.. హరికథా ప్రక్రియను ఉపయోగించుకుని సామాజిక చైతన్యాన్ని ఉద్భోదిస్తూ కులమతవర్ణ వివక్షను వీడి వసుధైక కుటుంబంలా కలసి మెలసి జీవించమని చెప్పిన హాయైన కథ. సాథారణంగా ఇలాంటి సాంఘీక కథలు/సందేశాలూ హరికథా ప్రక్రియలో ఇమడ్చడానికి ప్రయత్నించినా అంతగా ఆకట్టుకోలేవు కానీ ఈ కథ మాత్రం ప్రత్యేకం. దండిభట్ల నారాయణమూర్తి గారు చక్కని తేటతెలుగు పదకట్టుతో రాస్తే బాలూ తన స్పష్టమైన ఉచ్చారణతో ఆసాంతం కదలకుండా వినేలా చేస్తాడు. మీరూ ఇక్కడ విని ఆస్వాదించండి. 

చిత్రం : దేవస్థానం

సాహిత్యం : దండిభట్లనారాయణమూర్తి

సంగీతం : స్వరవీణాపాణి

గానం : SP బాలు

గుణనుతి చేతును గణనాథా.. ప్రణతులు చేకొను ఘనవరదా..

అవరోధ శతమునణచు సదా అరింద్య వాహనా అభయప్రదా..

గుణనుతి చేతును గణనాథా..

రారే నిరతిమీర.. వినరారే తనివితీర

సాహిత్య లలిత సంగీత కలిత సందేశ యుత హరికథన్..

సంతోష రుచిర చాతుర్య ప్రచుర సల్లాప సుధల వసుధన్..

పంచంగ భాగవతులొచ్చె పంచ పూమాల చిడత జతతో..

పాపాయి మొదలు వయసైన ముసలి బాగంచు గాంచు ప్రభతో.. 

భక్తమహాశయులారా ఇది సమకాలీన పురాణ గాథ మానవత్వమపేక్షించి విశ్వశాంతి కాంక్షించి వర్ణ వ్యత్యాసముల ఖండించు లోక సంక్షేమ కాముక హరికథా కాలక్షేపము.. కాదిది కాలక్షేపము.. నిక్షేపము.. శ్రీమద్రమారమణగోవిందో హారి..

ఏ దేశము జూచిన ఏమున్నదీ గర్వకారణమ్మూ..

ఈ నుడి శ్రీశ్రీ ఏనాడనెనో ఎల్లెడల నిక్కమూ..

పొడమెను కయ్యము.. విడివడె నెయ్యమూ..

పొడమెను కయ్యము.. విడివడె నెయ్యమూ..

గడగడ వెడదిడు కలహ కులం..

రగులు పగలివిగొ.. తెగిన తలలివిగొ

ఊగు మదగజంలాగ మతం.. హరీ హరీ..

నదులకు బదులుగ కదులు రుధిరఝరి

చెదరిన కుదురుకు కుందు జగం.. 

సజ్జన భంజన దుర్జన గర్జన సంజారుల రణ సమయమిదే..

నాడు పున్నాగ పూల ధాత్రి

నేడు పన్నగ కాళ రాత్రీ.. 

జీవకోటిలో నరుడై పుట్టడమే గొప్పవరం ఆ వరమును పొంది వివేకముతో ఎన్నో సాధించిన మనిషి తోటివారితో సహవాసం వదిలి నైతికంగా తలక్రిందై నిత్యం ఘర్షణ పడుతున్నాడు. మరొక్కపర్యాయం భగవన్నామ స్మరణ శ్రీమద్రమారమణగోవిందో హారి..

ఎక్కువెవడు రా తక్కువెవడురా..

అందరిలా పుట్టావూ అందరితో పోతావు..

నరులను సృష్టించిన పరమాత్ముడే నాల్గువర్ణములు నావేననియే..

రామచరిత్రమ్మెవ్వరు రాసెరా..

భారతమ్ము ఏ మహర్షి ఊసురా..

ఏకలవ్యుడేజాతి వాడురా..

కన్నిచ్చిన.. తనకన్నిచ్చిన తిన్నడిదే కులమురా..

ఎక్కువెవడు రా తక్కువెవడురా..

ఈ ఒక్క కులమేనా చెలిమిని చీల్చేది.. మతమనే కమతం కూడా..

భరతఖండాన్నే కాక యావత్ భూమండలాన్ని కబళిస్తున్న భూతం ఈ మతం..

హితం చెప్పే మతాన్ని కొందరు ఉన్మాదంతో హతం వ్రతంగా మార్చారూ..

వారంటించిన బాంబు విస్ఫోటనాల దావానలంలో అమాయకులెందరో బలైపోతున్నారు.

ఏదేవుడు చెప్పాడయ్యా జీవుడ్ని చంపమనీ.. 

ఉగ్రవాద వ్యాఘ్రాన్ని శ్రీఘ్రమే మట్టుబెట్టి ఆ మట్టిలో శాంతీ సహనం సౌభ్రాత్రుత్వమనే పూల మొక్కలను నాటడమే మన ముందున్న తొలికర్తవ్యం. మనం నారుపోద్దాం నీరు పోయు వాడ్ని ప్రార్ధిద్దాం. శ్రీమధ్రమారమణ గోవిందో హారి.

విశ్వశాంతిని కోరుతూ వసుధైక కుటుంబంలా అందరం కలసి మెలసి ఉందాం.

పవమాన సుతుడు పట్టు పాదారవిందములకు..

నీనామ రూపములకు నిత్య జయమంగళం..   

శ్రీమధ్రమారమణ గోవిందో హరి.

సర్వేజనా సుజనాభవంతు.. సర్వే సుజనా సుఖినోభవంతు..

ఓం శాంతిశాంతిశాంతిః

పూర్తిగా చదువు

సీతాకళ్యాణం - వాగ్దానం(1961) సాహిత్యం

ఘంటసాల మాష్టారి గాత్ర మాధుర్యమో, శ్రీ రామ కథ లోని మహత్తో, పెండ్యాల వారి సంగీత మహిమో లేదా అసలు హరికధా ప్రక్రియ గొప్పతనమే అంతో నాకు సరిగా తెలియదు కానీ, ఈపాట ఎన్ని సార్లు విన్నా ఒళ్ళు పులకరిస్తూనే ఉంటుంది. రేలంగి, నాగేశ్వరరావు, కృష్ణకుమారి లపై చిత్రీకరించిన ఈ పాట లో విశేషమేమిటంటే.. చిత్రీకరణ లో ఎక్కడా శ్రీరామ కళ్యాణాన్ని చూపించరు కానీ కనులు మూసుకుని పాట వింటుంటే మాత్రం కళ్యాణ ఘట్టం అంతా కనుల ముందు సాక్షాత్కరిస్తుంది. ఇది రాసినది శ్రీశ్రీ గారు అని మొదటి సారి తెలిసినపుడు చాలా ఆశ్చర్య పోయాను. ఇక పాట విషయానికి వస్తే రేలంగి గారి బాణి లో చిన్న చిన్న చెణుకు లు విసురుతూ నవ్విస్తూ హుషారు గా సాగే కధ లో మనం మైమరచి పోతాం. "రఘూ రాముడూ... రమణీయ..." అని మొదలు పెట్టగనే తెలియకుండానే తన్మయంగా తల ఊపేస్తాం.. "ఎంత సొగసు కాడే.." అంటే అవును కదా అని అనిపించక మానదు... అసలు సొగసు అన్న మాట పలకడం లోనే ఘంటసాల గారు ఆ దివ్య సుందర మూర్తిని సాక్షాత్కరింప చేస్తారు.
మీరెపుడైనా జలపాతాన్ని దూరం నుండి కాకుండా దాని పై నుండి చూశారా... ప్రవాహం అంతా చాలా ప్రశాంతంగా, నిశ్శబ్దంగా ఏదో చిన్న పిల్ల కాలువ లా ప్రవహిస్తూ కనిపిస్తుంది... కాని ఒక్క సారి అంచుకు వెళ్ళి చూడగానే పైనుండి పోటెత్తుతూ ఉదృతంగా హుషారు గా ముందుకు దూకుతూ మనకి కనువిందు చేస్తుంది. ఇంత వర్ణించడమెందుకు చాలా సినిమా లలో జలపాతాల లో ప్రమాదం సీన్ల లో ఇది మీరు గమనించే ఉంటారు. అలానే అప్పటి వరకు నెమ్మదిగా వ్యాఖ్యానంతో సాగే కథ ఒక్క సారిగా "ఇనకుల తిలకుడు నిలకడ గల క్రొక్కారు మెఱుపు వలె నిల్చీ.." అని అంటూ ఆ జలపాతపు దూకుడునంతా తన స్వరం లో చూపించేస్తారు ఘంటసాల గారు. ఇక చివరికి వచ్చే సరికి హెచ్చు స్వరం లో ఒక్క సారి గా "ఫెళ్ళు మనె విల్లు... " అనగానే సీతమ్మవారి సంగతేమో కానీ కధ వింటున్న వారెవ్వరికైనా గుండె ఝల్లు మనక మానదు అంటే అతిశయోక్తి కాదేమో.

Seetha kalyanam_Ha...

పొయిన ఏప్రిల్ లో శ్రీరామ నవమి రోజు ఈ పాట చాలా గుర్తు చేసుకున్నాను అదే రోజు మధురవాణి గారు తన బ్లాగు లో ఈ పాట లింక్ ఇచ్చారు.. దానికి వెంటనే సాహిత్యం ఇద్దామనుకున్నాను కాని ఇన్ని రోజులకి కుదిరింది. మధురవాణి గారికి ధన్యవాదాలు తెలుపుకుంటూ మళ్ళీ అప్ లోడ్ చేయడానికి బద్దకించి, వారి ఈస్నిప్స్ యకౌంట్ నుండే ఎంబెడ్ చేయబడిన పాట ని, ఈ హరికథా సాహిత్యాన్ని ఇక్కడ మీకోసం ఇస్తున్నాను. విని, చదివి ఆనందించండి తప్పులేమన్నా ఉంటే వ్యాఖ్య ద్వారా తెలియచేయండి.

చిత్రం : వాగ్దానం
సంగీతం : పెండ్యాల
గానం : ఘంటసాల
సాహిత్యం : శ్రీశ్రీ

శ్రీ నగజా తనయం సహృదయం
శ్రీ నగజా తనయం సహృదయం
చింతయామి సదయం త్రిజగన్మహోదయం
శ్రీ నగజా తనయం...ఊ..ఊ...

శ్రీ రామ భక్తులారా ఇదీ సీతాకళ్యాణ సత్కథ
నలభై రోజులనుంచీ చెప్పిన కథ చెప్పిన చోట చెప్పకుండా చెప్పుకొస్తున్నాను
అంచేత కించిత్తు గాత్ర సౌలభ్యానికి అభ్యంతరం ఏర్పడినట్లు తోస్తుంది
నాయనా కాస్త పాలూ మిరియాలూ ఏమైనా...
చిత్తం.. సిద్దం...

భక్తులారా... సీతామహాదేవి స్వయంవరానికి ముల్లోకాలనుంచీ విచ్చేసిన వీరాధి వీరుల్లో..
అందరినీ ఆకర్షించిన ఒకే ఒక్క దివ్య సుందర మూర్తి ఆహ్హ !! అతడెవరయ్యా అంటే...

రఘూరాముడు రమణీయ వినీల ఘన శ్యాముడు..
రమణీయ... వినీల.. ఘన శ్యాముడు..
వాడు నెలరేడు సరిజోడు మొనగాడు..
వాని కనులు మగమీలనేలు రా..
వాని నగవు రతనాల జాలు రా..
వాని కనులు మగమీలనేలు రా..
వాని నగవు రతనాల జాలు రా..
వాని జూచి మగవారలైన మైమరచి మరుల్కొనెడు మరో మరుడు మనోహరుడు..రఘూరాముడు

సనిదనిసగ రిగరి రిగరి సగరి రిగరి సగగరి సనిదని
సగగరి సని రిసనిస రిసనిస నిదపమగరి రఘురాముడు...
ఔనౌను...
సనిస సనిస సగరిరిగరి సరిసనిస..పదనిస..
సనిగనినిస సనిరిసనిదని నిదసనిదపమ గ మ స
నినినినిని..పస పస పస పస...
సఫ సఫ సఫ తద్దీం తరికిటతక...
రఘూరాముడూ రమణీయ వినీల ఘన శ్యాముడు..
శభాష్..శభాష్...

ఆప్రకారంబుగా విజయం చేస్తున్న శ్రీరామచంద్రమూర్తిని అంతఃపుర గవాక్షం నుండీ సీతాదేవి ఓరకంట చూచినదై
చెంగట నున్న చెలికత్తె తో.. ఎంత సొగసుగాడే..ఎంత సొగసుగాడే మనసింత లోనే దోచినాడే... ఎంత సొగసుగాడే...
మోము కలువ రేడే ఏ..ఏ.. ఏ... మోము కలువ రేడే నా నోము ఫలము వీడే...
శ్యామలాభిరాముని చూడగ నామది వివశమాయె నేడే... ఎంత సొగసుగాడే..
ఇక్కడ సీతాదేవి ఇలా పరవశయై ఉండగా..
అక్కడ స్వయం వర సభా మంటపంలో జనక మహీపతి సభాసదులను చూచి
అనియెనిట్లు ఓ యనఘులార నా యనుగు పుత్రి సీతా...
వినయాదిక సద్గుణ వ్రాత.. ముఖ విజిత లలిత జలజాత...
ముక్కంటి వింటి నెక్కిడ జాలిన ఎక్కటి జోదును నేడు
మక్కువ మీరగ వరించి మల్లెల మాల వైచి పెండ్లాడు...ఊ..ఊ...

అని ఈ ప్రకారం జనక మహారాజు ప్రకటించగానే సభలోని వారందరూ ఎక్కడివారక్కడ చల్ల బడి పోయారట...
మహా వీరుడైన రావణాసురుడు కూడా..హా ఇది నా ఆరాధ్య దైవమగు పరమేశ్వరుని చాపము
దీనిని స్పృశించుట యే మహా పాపము అని అనుకొనిన వాడై వెనుదిరిగి పోయాడట తదనంతరంబున...

ఇనకుల తిలకుడు నిలకడ గల క్రొక్కారు మెఱుపు వలె నిల్చీ..
తన గురువగు విశ్వామితృని ఆశీర్వాదము తలదాల్చి...
సదమల మద గజ గమనము తోడ స్వయంవర వేదిక చెంత..
మదన విరోధి శరాసనమును తన కరమున బూనిన యంత...

ఫెళ్ళు మనె విల్లు గంటలు ఘల్లు మనే...
ఘుభిల్లుమనె గుండె నృపులకు..
ఝల్లు మనియె జానకీ దేహమూ...
ఒక నిమేషమ్మునందె.. నయము జయము ను
భయము విస్మయము గదురా... ఆఆ ఆఆ
శ్రీమద్రమారమణ గోవిందో హారి... హారి
భక్తులందరు చాలా నిద్రావస్త లో ఉన్నట్టుగా ఉంది మరొక్కసారి..
జై శ్రీమద్రమారమణ గోవిందో హారి... హారి
భక్తులారా ఆ విధంగా శ్రీరామచంద్రమూర్తి శివ ధనుర్బంగము కావించినాడు...
అంతట..
భూతల నాధుడు రాముడు ప్రీతుండై పెండ్లియాడే..
పృథుగుణ మణి సంఘాతన్ భాగ్యో పేతన్ సీతన్..
భూతల నాధుడు రాముడు ప్రీతుండై పెండ్లియాడే..
శ్రీమద్రమారమణ గోవిందో హారి... హారి

పూర్తిగా చదువు

రామా కనవేమి రా !!

శ్రీ రామ నవమి సంధర్బంగా తోటి బ్లాగరు లందరికీ, పాఠకులకూ, నా హృదయపూర్వక శ్రీరామ నవమి శుభాకాంక్షలు. అంతా ఈ పాటికి పూజలు గట్రా ముగించుకుని రేడియో లో కళ్యాణం వింటూ ఉండి ఉంటారు. రేడియో లో వింటం ఏమిటి నా మొహం నేనింకా ఎనభైల లోనే ఉన్నాను !! ఇప్పుడన్నీ లైవ్ ప్రోగ్రాం లే కదా... సరే లెండి టీవీ లో చూస్తుండి ఉంటారు. నా మటుకు నాకు శ్రీరామ నవమి అనగానే మొదట గుర్తొచ్చేది భద్రాచలం లోని రాముని కళ్యాణం, ఆ వైభవానికి తగ్గట్టుగా ఇక ఉషశ్రీ గారి వ్యాఖ్యానం (ఇక్కడ క్లిక్ చేసి వినవచ్చు), ముఖ్యమంత్రి నెత్తిన పెట్టుకుని మరీ తీసుకు వచ్చే ముత్యాల తలంబ్రాలు, దేనికవే సాటి. వాటి తర్వాత వీధి వీధి నా వెలసే నవమి పందిళ్ళు. ఆ పందిళ్ళ లో దొరికే బెల్లం పానకమూ, వడపప్పూ. ఇక ఒకో బజారు లో పోగైన చందాల ను పట్టీ అక్కడ ఉండే కలిగిన వాళ్ళని బట్టీ వాళ్ళ వాళ్ళ శక్తి కి తగ్గట్టు గా ఒకప్పుడు నాటకాలు, కోలాటాలు, డ్యాన్సు లు ఏర్పాటు చేస్తే ఆ తర్వాత అంటే నేను కాస్త పెద్దయ్యాక 16mm ప్రొజక్టర్ లతో సినిమాలు, ఆ తర్వాత మరికొన్నాళ్ళకి వీధి కొకటి గా వెలసిన దివాకరం వీడియో షాపు నుండి వీడియో క్యాసెట్ లు టీవీ సెట్ లు అద్దెకు తెచ్చి వాటిలో పాత సినిమాలు వేసే వాళ్ళు. ప్రస్తుతం డీవీడీ లతో పైరసీ సినిమాలు వేసే స్థాయి కి ఎదిగి పోయుంటార్లెండి.

సరే ఇంకా రామనవమి అనగానే నాకు సీతారాముల కల్యాణం చూతము రారండీ పాట గుర్తొస్తుంది. ఆ పాటా, ఇంకా పందిళ్ళ లో క్రమం తప్పకుండా వేసే లవకుశ లో పాటలు భాస్కర్ గారు తన టపా లో అల్రెడీ వేసేసారు (ఆ టపా ఇక్కడ చూడండి) ఇవేకాక ఇంకా సీతారామ కల్యాణం అనగానే ఖచ్చితంగా ఓ రెండు హరికధలు గుర్తుకు వస్తాయి. ఈ రెండూ సోషల్ సినిమాలకు సంభందించినవైనా అందులో సీతా రాములను చూపించక పోయినా ఆ వర్ణన, సంగీతం, గాత్రం మనల్ని మంత్ర ముగ్దులను చేస్తాయి. వాటిలో మొదట గుర్తు వచ్చేది వాగ్దానం సినిమా లో ఘంటసాల గారు గానం చేసిన సీతా కళ్యాణం హరికధ. రేలంగి గారి బాణి లో చిన్న చిన్న చెణుకు లు విసురుతూ నవ్విస్తూ హుషారు గా సాగే కధ లో మనం మైమరచి పోతాం. "రఘూ రాముడూ... రమణీయ..." అని మొదలు పెట్టగనే తెలియకుండానే తన్మయంగా తల ఊపేస్తాం.. "ఎంత సొగసు కాడే.." అంటే అవును కదా అని అనిపించక మానదు... అసలు సొగసు అన్న మాట పలకడం లోనే ఘంటసాల గారు ఆ దివ్య సుందర మూర్తిని సాక్షాత్కరింప చేస్తారు. ఇక చివరికి వచ్చే సరికి హెచ్చు స్వరం లో ఒక్క సారి గా "ఫెళ్ళు మనె విల్లు... " అనగానే సీతమ్మవారి సంగతేమో కానీ కధ వింటున్న వారెవ్వరికైనా గుండె ఝల్లు మనక మానదు అంటే నమ్మండి. ఈ పాట నాకు పూర్తిగా ఎక్కడా దొరక లేదు. దొరికిన వెంటనే పోస్ట్ చేస్తాను.

ఇక రెండోది స్వాతి ముత్యం సినిమా లోనిది. విశ్వనాధ్ గారి దర్శకత్వం, కమల్ అభినయం, హరికధ, భజన, కోలాటం అన్ని కలిపి ఇళయరాజా గారు స్వరకల్పన చేసిన ఈ పాటను బాలు గారు అలరిస్తారు. నాకు ఈ పాట చాలా ఇష్టమ్ ఎక్కువ సార్లు వినడం వలనో ఏమో దదాపు నోటికి కంఠతా వచ్చు :) కాలేజ్ లో కూడా ఒకరిద్దరు ఫ్రెండ్స్ అడిగి మరీ ఈ పాట పాడించుకునే వారు నా చేత... ఈ పాట శ్రీరామ నవమి సంధర్బంగా మీ కోసం.

చిత్రం: స్వాతిముత్యం (1986)
గానం : బాలసుబ్రహ్మణ్యం,శైలజ
సాహిత్యం : ఆత్రేయ
సంగీతం : ఇళయరాజ

రామా కనవేమి రా
రామా కనవేమిరా శ్రీ రఘు రామ కనవేమిరా
రామా కనవేమి రా
రమణీ లలామ నవ లావణ్య సీమ
ధరాపుత్రి.. సుమ గాత్రి..
ధరాపుత్రి సుమ గాత్రి నడయాడి రాగా
రామా కనవేమి రా !!

సీతా స్వయంవరం ప్రకటించిన పిమ్మట జనకుని కొలువులో ప్రవేసించే జానకిని
సభాసదులందరు పదే పదే చూడగా శ్రీ రామ చంద్ర మూర్తి
కన్నెత్తి సూడడేమని అనుకుంటున్నారట తమలో సీతమ్మ అనుంగు చెలికత్తెలు

||రామా కనవేమి రా||

ముసి ముసి నగవుల రసిక శిఖామణులు సా నిదమ ప మగరిస
ఒసపరి చూపుల అసదృశ విక్రములు సగరిగ మనిద మ ని ని
ముసిముసి నగవుల రసిక శిఖామణులు తా తకిట తక ఝణుత
ఒసపరి చూపుల అసదృశ విక్రములు తకఝణు తకధిమి తక
మీసం మీటే రోష పరాయణులు నీ దమప మా గరిగ
మా సరి ఎవరను మత్త గుణొల్వణులూ.. ఆహ..
క్షణమే.. ఒక దినమై.. నిరీక్షణమే.. ఒక యుగమై...
తరుణి వంక శివ ధనువు వంక
తమ తనువు మరచి కనులు తెరచి చూడగ
రామా కనవేమిరా..కనవేమిరా..

ముందుకేగి విల్లందబోయి ముచ్చెమటలు కక్కిన దొరలు భూ వరులు
తొడగొట్టి ధనువు చేపట్టి బావురని గుండెలు జారిన విభులు

ముందుకేగి విల్లందబోయి ముచ్చెమటలు కక్కిన దొరలు భూ వరులు
తొడగొట్టి ధనువు చేపట్టి బావురని గుండెలు జారిన విభులు
అహ గుండెలు జారిన విభులు
విల్లెత్తాలేక మొగమెత్తాలేక సిగ్గేసిన నరపుంగవులూ
తమ వళ్ళు వొరిగి రెండు కళ్ళు తిరిగి వొగ్గేసిన పురుషాగ్రణులూ
ఎత్తే వారు లేరా అ విల్లు ఎక్కు పెట్టే వారు లేరా
ఆ ఎత్తే వారు లేరా అ విల్లు ఎక్కు పెట్టే వారు లేరా
అరెరె ఎత్తే వారు లేరా అ విల్లు ఎక్కు పెట్టే వారు లేరా
అహ ఎత్తే వారు లేరా అ విల్లు ఎక్కు పెట్టే వారు లేరా
కడక తైయ్యకు తా ధిమి తా..

రామాయ రామభద్రాయ రామచంద్రాయ నమః
అంతలొ రామయ్య లేచినాడు ఆ వింటి మీద చెయ్యి వేసినాడు
అంతలొ రామయ్య లేచినాడు ఆ వింటి మీద చెయ్యి వేసినాడు
సీత వంక ఓరకంట చూసినాడు
సీత వంక ఓరకంట చూసినాడు
ఒక్క చిటికలో విల్లు ఎక్కు పెట్టినాడు
చిటికలో విల్లు ఎక్కు పెట్టినాడు
ఫెళ ఫెళ ఫెళ ఫెళ ఫెళ ఫెళ విరిగెను శివ ధనువు
కళలొలికెను సీతా నవ వధువు
జయ జయ రామ రఘుకుల సొమ ||2||
దశరథ రామ దైత్యవి రామ ||2||
జయ జయ రామ రఘుకుల సొమ ||2||
దశరథ రామ దైత్యవి రామ ||2||

సీతా కల్యాణ వైభోగమే శ్రీ రామ కల్యాణ వైభోగమే ||2||
కనగ కనగ కమనీయమె అనగ అనగ రమణీయమె ||2||
సీతా కల్యాణ వైభోగమే శ్రీ రామ కల్యాణ వైభోగమే
రామయ్య అదుగోనయ్య
రమణీ లలామ నవ లావణ్య సీమ
ధరాపుత్రి సుమ గాత్రి నడయాడి రాగా
రామా కనవేమిరా శ్రీ రఘు రామ కన వేమిరా ఆ.. ఆ.. ఆ..
రామా కనవేమి రా

పూర్తిగా చదువు