గురువారం, డిసెంబర్ 03, 2020

ఆకాశం తాకేలా...

నువ్వొస్తానంటే నేనొద్దంటానా చిత్రంలోని ఒక చక్కని పాటను ఈ రోజు తలచుకుందాం. ఈ పాట ఆడియో మాత్రమే  వినాలంటే ఇక్కడ వినవచ్చు లేదా ఇక్కడ డౌన్లోడ్ చేస్కోవచ్చు. ఎంబెడెడ్ వీడియో ఇక్కడ చూడవచ్చు. 


చిత్రం : నువ్వొస్తానంటే నేనొద్దంటానా (2005)
సంగీతం : దేవీశ్రీప్రసాద్ 
సాహిత్యం : సిరివెన్నెల  
గానం : బాలు 

ఘల్ ఘల్ ఘల్ ఘల్ 
ఘలన్ ఘలన్ ఘల్ ఘల్ ఘల్
ఘల్ ఘల్ ఘల్ ఘల్ 
ఘలన్ ఘలన్ ఘల్ ఘల్ ఘల్

ఆకాశం తాకేలా వడగాలై ఈ నేల
అందించే ఆహ్వానం ప్రేమంటే
ఆరాటం తీరేలా బదులిచ్చే గగనంలా
వినిపించే తడిగానం ప్రేమంటే
అణువణువును మీటే మమతల మౌనం
పదపదమంటే నిలవదు ప్రాణం
ఆ పరుగే ప్రణయానికి శ్రీకారం

దాహంలో మునిగిన చివురుకు 
చల్లని తన చెయ్యందించి
స్నేహంతో మొలకెత్తించే చినుకే ప్రేమంటే
మేఘంలో నిద్దురపోయిన 
రంగులు అన్నీ రప్పించి
మాగాణి ముంగిట పెట్టే ముగ్గే ప్రేమంటే

ఘల్ ఘల్ ఘల్ ఘల్ 
ఘలన్ ఘలన్ ఘల్ ఘల్ ఘల్
ఘల్ ఘల్ ఘల్ ఘల్ 
ఘలన్ ఘలన్ ఘల్ ఘల్ ఘల్

ప్రాణం ఎపుడు మొదలైందో 
తెలుపగల తేదీ ఏదో 
గుర్తించేందుకు వీలుందా
ప్రణయం ఎవరి హృదయంలో 
ఎపుడు ఉదయిస్తుందో
గమనించే సమయం ఉంటుందా

ప్రేమంటే ఏమంటే చెప్పేసే 
మాటుంటే ఆ మాటకి తెలిసేనా ప్రేమంటే
అది చరితలు సైతం చదవని వైనం 
కవితలు సైతం పలకని భావం
సరిగమలెరుగని మధురిమ ప్రేమంటే

దరిదాటి ఉరకలు వేసే ఏ నదికైనా తెలిసిందా
తనలో ఈ ఒరవడి పెంచిన తొలి చినుకేదంటే
సిరి పైరై ఎగిరే వరకూ చేనుకు మాత్రం తెలిసిందా
తనలో కనిపించే కళలకు తొలి పిలుపేదంటే

ఘల్ ఘల్ ఘల్ ఘల్ 
ఘలన్ ఘలన్ ఘల్ ఘల్ ఘల్
ఘల్ ఘల్ ఘల్ ఘల్ 
ఘలన్ ఘలన్ ఘల్ ఘల్ ఘల్

మండే కొలిమినడగందే 
తెలియదే మన్ను కాదు 
ఇది స్వర్ణమంటు చూపాలంటే
పండే పొలము చెబుతుందే 
పదునుగా నాటే నాగలి 
పోటే చేసిన మేలంటే

తనువంతా విరబూసే గాయాలే 
వరమాలై దరిజేరే ప్రియురాలే గెలుపంటే
తను కొలువై ఉండే విలువే ఉంటే
అలాంటి మనసుకు తనంత తానే
అడగక దొరికే వరమే వలపంటే
జన్మంతా నీ అడుగుల్లో 
అడుగులు కలిపే జత ఉంటే
నడకల్లో తడబాటైనా నాట్యం అయిపోదా 
రేయంతా నీ తలపులతో 
ఎర్రబడే కన్నులు ఉంటే
ఆ కాంతే నువ్వెతికే సంక్రాంతై ఎదురవదా

ఘల్ ఘల్ ఘల్ ఘల్ 
ఘలన్ ఘలన్ ఘల్ ఘల్ ఘల్
ఘల్ ఘల్ ఘల్ ఘల్ 
ఘలన్ ఘలన్ ఘల్ ఘల్ ఘల్
 

0 comments:

వ్యాఖ్యను పోస్ట్ చెయ్యండి

పోస్ట్ కంటెంట్ తో సంబంధంలేని మరియూ బ్లాగ్ అగ్రిగేటర్స్ ని స్పామ్ చేసే ప్రమోషనల్ కామెంట్స్ పబ్లిష్ చేయబడవు.

నేను ??

నా ఫోటో
గుంటూరు, ఆంధ్రప్రదేశ్, India
అర్ధంకానివాళ్ళకో ప్రశ్నార్థకం, అర్ధమైన వాళ్ళకో అనుబంధం. ఈ లోకంలో ఎందరో పిచ్చాళ్ళున్నారు. డబ్బు, పదవి, కీర్తి, కాంత, కనకం, ప్రేమ, సినిమా, మంచితనం, తిండి ఇలా ఎవరికి తోచిన పిచ్చిలో వాళ్ళు మునిగి తేలుతుంటారు. నేనూ ఓ పిచ్చోడ్నే.