రాధా మానస రాగ సుగంధా

కొన్ని సినిమాలు ఫ్లాప్ అవడం మూలంగా ఎంతో చక్కగా స్వరపరచిన గీతాలు సైతం మరుగున పడిపోతాయ్. అలా దెబ్బతిన్నపాటే "ఆ ఒక్కడు" సినిమాలోని ఈ చక్కటి గీతం. వేదవ్యాస్ గారు రాయగా నారాయణ్ గారు గానం చేసారు. ఈ గీతానికి మణిశర్మ స్వరాన్నందించారో లేక వేరే ఎవరైనా అందించారా అన్న అనుమానం నాకైతే ఉంది. అంటే అంత మధురమైన స్వరాన్ని అందించారు. పాట వింటూ మరో లోకాలలోకి పయనిస్తామనడంలో ఎలాంటి అతిశయోక్తిలేదు. సినిమా పాటలలో వచ్చే భక్తిగీతాలలో అలరించే అతికొద్ది పాటలలో ఇదీ ఒకటి. పూర్తి పాట ఆడియో మాత్రం వినాలంటే ఇక్కడ క్లిక్ చేసి వినవచ్చు పాట సినిమాలో సగమే ఉన్నట్లుంది ఆ వీడియో ఈ క్రింద ఇస్తున్నాను చూడండి.

చిత్రం : ఆ ఒక్కడు
సంగీతం : మణిశర్మ
సాహిత్యం : వేదవ్యాస రంగ భట్టాచార్య
గానం : డాక్టర్ నారాయణ్.

రాధా మానస రాగ సుగంధా కృష్ణా గోవిందా
గోపి యవ్వన పుష్ప మిళింద లీలా మకరందా
శ్రీ బృందావన మోహన మురళీ రవళి రసకందా
రారా గోకుల నంద ముకుందా రారా కరివరదా

రాధా మానస రాగ సుగంధా కృష్ణా గోవిందా
గోపి యవ్వన పుష్ప మిళింద లీలా మకరందా

మంచిని పెంచే మధుమయ హృదయా
వంచన తుంచే వరగుణ వలయా
మమతను పంచే సమతా నిలయా
భక్తిని ఎంచే బహుజన విజయా
మాయా ప్రభవా మాధవ దేవా
మహిమా విభవా మధుభావా
శ్రీ కృష్ణా మా తృష్ణా నీ పైనా

రాధా మానస రాగ సుగంధా కృష్ణా గోవిందా
గోపి యవ్వన పుష్ప మిళింద లీలా మకరందా

ధర్మము తరిగీ నలిగిన వేళ
చరలో చేరిన ఓ యదు వీరా
కళగా సాగే కరుణాధారా
పరమై వెలిగే వర మందారా
పదములు చూపే పరమోద్ధారా
భారము నీదే భాగ్యకరా
శ్రీ కృష్ణా మా తృష్ణా నీ పైనా

రాధా మానస రాగ సుగంధా కృష్ణా గోవిందా
గోపి యవ్వన పుష్ప మిళింద లీలా మకరందా
శ్రీ బృందావన మోహన మురళీ రవళి రసకందా
రారా గోకుల నంద ముకుంద రారా కరివరదా

రాధా మానస రాగ సుగంధా కృష్ణా గోవిందా
గోపి యవ్వన పుష్ప మిళింద లీలా మకరందా 

Posted in: మణిశర్మ,వేణుగాన సమ్మోహనం