బుధవారం, డిసెంబర్ 30, 2009

ఒకటే జననం.. ఒకటే మరణం..

చాలా రోజులుగా రాద్దాం అనుకుంటున్న ఈ టపా అనుకోకుండా ఈ పాట ఈ వారం ఈనాడు ఆదివారం సంచిక లో రచయిత సుద్దాల అశోక్ తేజగారి వ్యాఖ్యానంతో కనిపించే సరికి వెంటనే ప్రచురించేస్తున్నాను. ఈ సినిమా శ్రీహరి సినిమాల్లో నాకు నచ్చిన వాటిలో ఒకటి, కాస్త లాజిక్కులను పక్కన పెట్టి చూస్తే కంట్రోల్డ్ యాక్షన్ తో ఆకట్టుకుంటుంది ఒక సారి ఛూసి ఆనందించవచ్చు. ఇది నచ్చడానికి మరో కారణం సింధుమీనన్ కూడా లేండి. తన మొదటి తెలుగు సినిమా అనుకుంటాను మోడర్న్ డ్రస్సుల్లో కాకుండా మన పక్కింటి అమ్మాయిలా సాదాసీదాగా చూడచక్కగా ఉండి ఇట్టే ఆకట్టుకుంటుంది. పాటకచేరి శీర్షిక నిర్వహిస్తున్న ఈనాడు వారికి ధన్యవాదాలు తెలుపుకుంటూ ఆ పత్రిక క్లిప్పింగ్ కూడా ఇక్కడ ఇస్తున్నాను ఆసక్తి ఉన్నవారు చదువుకోవచ్చు.

సాహిత్యానికి సంగీతమో సంగీతానికి సాహిత్యమో తెలియదు కానీ ఈ పాటలో రెండూ ఒకదానికి ఒకటి అన్నట్లు ఒదిగి పోతాయి. పల్లవిలో ఉన్న ఫోర్స్ చరణాలలో కొంచెం తగ్గినట్లు కనిపిస్తుంది కానీ మొత్తం పాట విన్నపుడు ఒకే రకమైన ఉత్తేజాన్ని ఇస్తుంది. పల్లవి ఎత్తుగడ మాత్రం అద్భుతం సాహిత్యం పరంగా కానీ సంగీత పరంగా కానీ. నేను వాకింగ్ చేసేప్పుడు వినే ప్లేలిస్ట్ లో ఈ పాట మొదట ఉండేది (అంటే వాకింగ్ చేసింది కొద్దిరోజులైనా ఇలాటి అర్భాటలకు తక్కువ చేసే వాడ్ని కాదులెండి:-) నిజం చెప్పద్దూ, ఇదీ, ముత్తులో ఒకడే ఒక్కడు మొనగాడు, తమ్ముడు లో look at my face లాంటి పాటలు వింటూ జిమ్ కెళ్తే వచ్చే ఆ ఉత్సాహం  ఆనందం మాటల్లో చెప్పలేం అంటే నమ్మండి. సరే మరి మీరు విని ఉండక పోతే ఒకసారి వినేయండి.


చిత్రం : భద్రాచలం
సంగీతం : వందేమాతరం శ్రీనివాస్
సాహిత్యం : సుద్దాల అశోక్ తేజ
గానం : శంకర్ మహదేవన్, చిత్ర

ఒకటే జననం ఒకటే మరణం
ఒకటే గమనం ఒకటే గమ్యం
గెలుపు పొందె వరకూ అలుపు లేదు మనకు..
బతుకు అంటె గెలుపూ గెలుపుకొరకె బ్రతుకు..
కష్టాలు రానీ కన్నీళ్ళు రానీ
ఏమైన గానీ ఎదురేది రానీ
ఓడిపోవద్దు రాజీపడొద్దు
నిద్ర నీకొద్దు నీకేది హద్దు

||ఒకటే||

రాబోయే విజయాన్ని పిడికిలిలో చూడాలి
ఆ గెలుపూ తప్పట్లే గుండెలలో మోగాలీ
నీ నుదిటీ రేఖలపై సంతకమే చేస్తున్నా
ఎదనిండా చిరునవ్వే చిరునామై ఉంటున్నా
నిన్నే వీడని నీడవలే నీతో ఉంటా ఓ నేస్తం
నమ్మకమే మనకున్న బలం

నీలికళ్ళలో మెరుపూ మెరవాలి
కారు చీకట్లో దారి వెతకాలి
గాలివానల్లో ఉరుమై సాగాలి
తగిలే గాయాల్లో గేయం ఊదాలి

||ఒకటే||

నిదరోకా నిలుచుంటా.. వెన్నెలలో చెట్టువలె
నీకోసం వేచుంటా.. కన్నీటీ బొట్టువలె
అడుగడుగు నీ గుండె ..గడియారం నేనవుతా
నువు నడిచే దారులలో.. ఎదురొచ్చి శుభమవుతా
రాసిగ పోసిన కలలన్నీ దోసిలి నిండా నింపిస్తా
చేతులు చాచిన స్నేహంలా ...

ముట్టుకున్నావా మువ్వా అవుతుంది
పట్టుకున్నావా పాటే అవుతుంది
అల్లుకున్నావా జల్లే అవుతుంది
హత్తుకున్నావా వెల్లుఔతుంది...

||ఒకటే||

ఈ నూతన సంవత్సరం ఈ పాటలా మీలో ఉత్తేజాన్ని నమ్మకాన్ని నింపి మీకందరికీ అన్ని శుభాలను చేకూర్చాలని, మీరు కోరుకున్న రీతిలో జీవిస్తూ సుఖసంతోషాలను మీ సొంతం చేసుకోవాలని ఆశిస్తూ... అందరికీ 2010 నూతనసంవత్సర శుభాకాంక్షలు, కాస్త ముందుగా :-)

మంగళవారం, డిసెంబర్ 22, 2009

మిడిసిపడే దీపాలివి !!

అప్పట్లో దూరదర్శన్ చిత్రలహరిలో ఒకటి రెండు సార్లు ఈ పాట చూసిన గుర్తు. చంద్రమోహన్ నల్లశాలువా ఒకటి కప్పుకుని ఏటి గట్టున అటు ఇటు తిరుగుతూ తెగ పాడేస్తుంటాడు. అతనికోసం కాదు కానీ నాకు చాలా ఇష్టమైన ఏసుదాస్ గారి గొంతుకోసం ఈ పాటను శ్రద్దగా వినే వాడ్ని. లిరిక్స్ కూడా చాలా బాగున్నాయ్ అనిపించేది. నా ఇంజనీరింగ్ మొదటి సంవత్సరం డిపార్ట్మెంట్ డే సంధర్బంగా జరిగిన పాటలపోటీలో నేను తప్పక పాల్గొనాలి అని మావాళ్ళంతా డిసైడ్ చేశారు. ర్యాగింగ్ పీరియడ్ లో బలవంతంగా నాతో పాడించిన పాటలను కాస్తో కూస్తో రాగయుక్తంగా పాడేసరికి నే బాగా పాడతాను అనే అపోహలో ఉండేవారు. సరే ఏ పాటపాడాలి అని తర్జన భర్జనలు పడటం మొదలుపెట్టాను. జేసుదాస్ పాటే పాడాలి అని మొదటే నిర్ణయించుకున్నాను కానీ ’ఆకాశదేశానా’, ’మిడిసిపడే’ పాటలలో ఏదిపాడాలి అని తేల్చుకోలేక చివరికి నా ఆప్తమితృడికి పాటలు రెండూ వినిపించి సలహా అడిగితే నీగొంతుకు ’మిడిసిపడే’ బాగ సూట్ అవుతుంది అదే అని ఖాయం చేసేసుకో అని చెప్పాడు. నాకు కూడా అదినిజమే అనిపించింది. అదీకాక "ఆకాశదేశాన" లోని సంగతులు సరిగా పాడలేకపోతున్నాను అని స్పష్టంగా తెలుస్తుంది.

అలా మొదటి సారి ఈ పాట పూర్తి సాహిత్యాన్ని సంగ్రహించి శ్రద్దగా నేర్చుకోవడం జరిగింది. పోటీ రోజు రానే వచ్చింది నాకు పాట పాడటం వచ్చినా సాహిత్యం సరిగా గుర్తుండేది కాదు. అదీకాక అందరి ముందు నుంచొని పాడవలసి వచ్చినపుడు మైండ్ బ్లాంక్ అయి అసలు గుర్త్తొచ్చేది కాదు. ఈ సారి ఎలా అయినా గెలవాలని పాట రాసుకుని పేపర్ చేతిలో పెట్టుకుని వెళ్ళాను. నా గొంతుకు కాస్తగాంభీర్యత జోడించి బోలెడంత విషాదాన్ని నింపి సీరియస్ గా పాడటం మొదలు పెట్టాను. అప్పటివరకూ కాస్త అల్లరి చేస్తున్నవారు సైతం నిశ్శబ్దంగా పాటలోలీనమై వినడం మొదలుపెట్టారు, మొదటి చరణం పూర్తైంది శ్రోతల కళ్ళలో ప్రశంస స్పష్టంగా కనిపించింది, రెండవచరణం మొదలు పెట్టాక అందులో చివరి లైన్లు ఎప్పుడూ గుర్తుండేవే అన్నధైర్యంతో పేపర్ మడిచి లోపల పెట్టేశాను కానీ అక్కడికి వచ్చేసరికి హఠాత్తుగా ఆ లైన్లు మర్చి పోయి తడబడిపోయాను. మళ్ళీ పేపర్ తీసి పాట పూర్తి చేయవలసి వచ్చింది. జడ్జిలు నువ్వు ఆ పేపర్ పెట్టుకోకుండా తడబడాకుండా పాడితే ప్రైజ్ నీదే అయి ఉండేది, పైన చెప్పిన కారణాల వలన నిన్ను నాలుగో స్థానానికి నెట్టేయవలసి వచ్చింది అని వ్యాఖ్యానించారు. 

ఈపాట ఎప్పుడు విన్నా ఆనాటిసంఘటన అంతా కళ్ళకు కట్టినట్లు కనిపిస్తుంది. నా క్లాస్ మేట్ ఒక అమ్మాయి అయితే వీడికి ఏదో చాలా పే..ద్ద ఫ్లాష్ బ్యాక్ ఉండి ఉంటుంది అందుకే ఇంత విషాదగీతాన్ని భావయుక్తంగా పాడుతున్నాడు అనుకుందిట. తరువాత రోజుల్లో నాకు మంచి నేస్తమయ్యాక "అసలు సంగతేంటి గురూ.." అని అడిగింది అంత స్టోరీ లేదమ్మా అని చెప్పాను. ఇంజనీరింగ్ లో కాదుకానీ తర్వాత రోజులో ఈపాట పాడుకోదగిన అనుభవాలు కొన్ని ఎదురయ్యాయి కాని ఎక్కువ కాలం బాధించలేదనుకోండి అది వేరే విషయం. ఇంతకీ విషయం ఏమిటంటే పాట చాలా బాగుంటుంది, వేటూరి గారి సాహిత్యం ఆకట్టుకుంటే రాజా సంగీతం హృదయాన్ని సున్నితంగా స్పృశిస్తుంది. ఇక ఏసుదాస్ గారి గొంతు మరింత వన్నెచేకూర్చింది అని చెప్పాల్సిన పనేలేదు.





చిత్రం : ఆస్తులు అంతస్తులు
సంగీతం : ఇళయరాజా
సాహిత్యం : వేటూరి
గానం : కె.జె.ఏసుదాస్

మిడిసి పడే దీపాలివి
మిన్నెగసి పడే కెరటాలివి
మిడిసి పడే దీపాలివి
మిన్నెగిసి పడే కెరటాలివి
వెలుగు పంచలేవు ఏ దరిని చేరుకోవు
వెలుగు పంచలేవు ఏ దరిని చేరుకోవు
ఈ జీవితమే ఒక గమ్యం లేని నావ
సుఖ దుఃఖాలే ఏకమైన రేవులో

||మిడిసి||

బావి లోతు ఇంతని తెలుసు
నదుల లోతు కొంతే తెలుసు
ఆడ గుండె లోతు ఎంతో లోకం లో యెవరికి తెలుసు
ఏ నిమిషం ప్రేమిస్తుందో ఏ నిమిషం పగబడుతుందో
ఎప్పుడెలా మారుతుందో తెలిసిన మగవాడు లేడు
రాగం అనురాగం ఎర వేసి జత చేరి
కన్నీట ముంచుతుందిరా

||మిడిసి||

పాము విషం సోకిన వాడు ఆయువుంటె బతికేస్తాడు
కన్నె వలపు కరిచిన వాడు నూరేళ్ళకి తేరుకోడు
సొగసు చూసి మనసిచ్చావా బందీగా నిలబడతావు
నీ కలలే విరిగిననాడూ కలతే నీ తోడవుతుంది
లేదు ఏ సౌఖ్యం రవ్వంత సంతోషం ఈ ఆడదాని ప్రేమలో

||మిడిసి||

ఇదే పాట కథానాయిక పాడినది ఇక్కడ చూడండి. రెండు సాహిత్యాలు వేటికవే సాటి అన్నట్లు ఉన్నాయి. ఇదికూడా వేటూరిగారే రాశారేమో తెలియదు. ఈ పాటను కామెంట్ ద్వారా అందించిన తృష్ణ గారికి ధన్యవాదాలు.

 

అలుపు రాని కెరటాలివి
ఏ గెలుపు లేని హృదయాలివి
వయసు ఊరుకోదు ఆ వలపుమాసిపోదు
ఏనాడైనా తెరచాప లేని నావ
చేరగలిగేనా తను కోరుకున్న రేవుకి

||అలుపు||

ప్రేమించిన ఆడ మనసు ప్రాణమైన అర్పిస్తుంది
ప్రేమ విలువ తెలియకపోతే ఆడదెపుడు అర్ధం కాదు
తనువులోని అందం గాని మనసులోని మర్మం గానీ
నమ్మిన మగవాడి ముందు ఏ ఆడది దాచలేదు
లేదు నా నేరం...ఏముందో తెలిపావో
శిరసొంచి మొక్కుతానులే

||అలుపు||

ఆడదంటే అమృత హృదయం
తల్లితనమే సృష్టికి మూలం
పైట చాటు రొమ్ము వెనుక అమ్మ మనసు దాగుంటుంది
కన్నీటిని దాచుకుంటూ చిరునవ్వును పంచిస్తుంది
తను సీతై నిప్పుల పడిలో రామవాక్కు నిలబెడుతుంది
నాడు ఈనాడు ఆ రాత ఎద కోత
రవ్వంత మారలేదులే

||అలుపు||

ఆదివారం, డిసెంబర్ 13, 2009

ఓ నిండు చందమామ !!

లేతమావి చిగురులు అప్పుడే తిన్న గండు కోయిలలా... ఆ పరమేశ్వరుడు గరళాన్ని నిలిపినట్లు ఇతనెవరో అమరత్వాన్ని సైతం త్యాగం చేసి అమృతాన్ని తన గొంతులోనే నిలిపివేసాడా? ప్రతి పాటలోనూ అదే మాధుర్యాన్ని ఒలికిస్తున్నాడు అనిపించేటట్లు, తన విలక్షణమైన గళంతో శ్రోతలను మంత్ర ముగ్ధులను చేసే అద్భుతమైన గాయకుడు కె.జె.ఏసుదాసు. తను పాడినది కొన్ని పాటలే అయినా ఆయన పాటలను పదే పదే ఇప్పటికీ వింటున్నారంటే ఆపాటల సంగీత సాహిత్యాలు ఒక కారణమైనా ఆయన గళం లోని మాధుర్యం సైతం పెద్ద పాత్ర వహిస్తుంది అన్నదాంట్లో ఎలాంటి సందేహంలేదు. ఏసుదాస్ పేరు వినగానే తెలుగులో మొదట గుర్తు వచ్చేది మేఘసందేశం అయినా తర్వాత గుర్తొచ్చేది మోహన్ బాబు గారి పాటలు. ఇవేకాకుండా తెలుగులో ఆయన ఇంకా చాలా మంచి పాటలు పాడారు. ఇక హిందీ విషయానికి వస్తే ఆయన పేరు విన్న వెంటనే చిత్‍చోర్ చిత్రాన్ని అందులోని "గొరి తెర గావ్ బడాప్యారా" పాటనీ గుర్తు చేసుకోని వారు ఎవరూ ఉండరేమో.

తెలుగులో బాగా ప్రాచుర్యాన్ని పొందిన పాటలు చాలా ఉన్నా నాకు ఎందుకో ఈ "నిండు చందమామ.." పాట చాలా ఇష్టం. సహజంగా జాబిలి అంటే ఉన్న ఇష్టం వల్లనో తెలియదు. తనగొంతులోని మాధుర్యమో తెలియదు. సాహిత్యం లోని అందమో తెలియదు కారణమేదైనా నాకు చాలా నచ్చిన పాట ఇది. మొదటి సారి అలవోకగా విన్నపుడు పాత పాట కనుక పి.బి. శ్రీనివాస్ గారు పాడారేమో అనుకున్నాను కానీ గొంతు ఏసుదాస్ గారిదిలా ఉందే అని తర్వాత క్యాసెట్ పై చూసి అచ్చెరువొందాను. ఈన అప్పుడే ’63 లోనే తెలుగు సినిమాకు పాడారా అని. ఆరుద్ర గారి సాహిత్యం మదిలో గిలిగింతలు పెడితే, కోదండపాణి గారి సంగీతం హాయిగా సాగిపోతుంది. ఇక ఏసుదాస్ గారి గాత్రం గురించి  చెప్పనే అక్కరలేదు. ప్రత్యేకించి "నిండు చందమామ" కు ముందు "ఓ ఓ ఓ ఒ ఒ ఒ ఓ.." అని పలికినపుడు ఆహా అనిపించక మానదు. మీరు కూడా విని ఆనందించండి.


ఈ పాట వినాలంటే చిమట మ్యూజిక్ కోసం ఇక్కడ క్లిక్ చేయండి.

చిత్రం : బంగారు తిమ్మరాజు (1963)
సంగీతం : యస్.పి. కోదండపాణి
సాహిత్యం: ఆరుద్ర
గానం : కె.జె.ఏసుదాస్

ఓ నిండు చందమామ నిగ నిగలా భామ
ఒంటరిగా సాగలేవు కలసి మెలసి పోదామా..
ఓ..ఓ..ఓ...ఒ ఒ ఒ ఓ నిండు చందమామ...

నిదురరాని తీయని రేయి నిను పిలిచెను వలపుల హాయి
మధురమైన కలహాలన్నీ మనసుపడే ముచ్చటలాయే..

నిదురరాని తీయని రేయి నిను పిలిచెను వలపుల హాయి
మధురమైన కలహాలన్నీ మనసుపడే ముచ్చటలాయే..

మేలుకున్న స్వప్నములోనా ఏల ఇంత బిడియపడేవూ..
మేలుకున్న స్వప్నములోనా ఏల ఇంత బిడియపడేవూ..
ఏలుకునే ప్రియుడను కానా లాలించగ సరసకు రానా..

ఓ ఓ ఓ నిండు

దోర వయసు ఊహలు నీలో దోబూచులు ఆడసాగే..
కోరుకున్న మురిపాలన్నీ కొసరి కొసరి చెలరేగే..

దోర వయసు ఊహలు నీలో దోబూచులు ఆడసాగే..
కోరుకున్న మురిపాలన్నీ కొసరి కొసరి చెలరేగే..

నీదు మనసు నీలో లేదూ నాలోనె లీనమయే..
నీదు మనసు నీలో లేదూ నాలోనె లీనమయే..
నేటినుంచి మేనులు రెండూ నెరజాణా ఒకటాయే..

ఓ..ఓ..ఓ...ఒ ఒ ఒ ఓ నిండు చందమామ....

ఏసుదాస్ గారి గురించి చెప్పి ’గొరితెర గావ్ బడా ప్యారా’ వీడియో ఇవ్వకుండా ముగించాలని అనిపించడం లేదు అందుకనే ఈ పాటకు తగ్గ విజువల్స్ తో కూర్చిన ఈ అందమైన వీడియో మీకోసం.


బుధవారం, డిసెంబర్ 09, 2009

మల్లెలు పూసే... వెన్నెల కాసే...

బాలు గారు పాడిన ఈ పాట నాకు చాలానచ్చే పాటలలో ఒకటి. హిందీలో కిషోర్ కుమార్ గారి పాటలలో సాహిత్యం, ట్యూన్ ఒక అందమైతే కిషోర్ కలిపే సంగతులు మరింత అందాన్నిస్తాయి. మెలొడీ + హిందీ అస్వాదించలేనంత చిన్న వయసు లోకూడా నేను కిషోర్ పాటలు ఈ జిమ్మిక్కుల కోసం వినే వాడ్ని. ఉదాహరణ కి దూరదర్శన్ లో ఆదివారం ఉదయం వచ్చే రంగోలీ లో ఈ పాట ఎక్కువగా వేసే వాడు. "చలాజాతాహూ కిసీకే దిల్ మే..." ఈ పాటలో మధ్య మధ్యలో కిశోర్ విరుపులు సాగతీతలు భలే ఉండేవి. ఇలాంటివే ఇంకా చాలా పాటలు ఉన్నాయ్.


ఇక ప్రస్తుతానికి వస్తే ఇంటింటి రామాయణం లోని ఈ పాటను కూడా బాలు తన స్వరంతోనే నవరసాలు పలికించేస్తారు. అక్కడక్కడ పదాలు పలకడం, సాగతీయడం లాటి సంగతులు పాటకు మరింత అందాన్ని ఇస్తాయి. "మల్లెలు పూసే వెన్నెలకాసే" అని వింటే మనకి నిజంగా వెన్నెల్లో తడిచినంత హాయైన అనుభూతి కలుగుతుందనడం అతిశయోక్తి కాదేమో. "ముసి ముసి నవ్వులలో.." అన్నచోట విరిసీ విరియని మొగ్గలా చిన్న నవ్వును మనమీద చిలకరిస్తారు.. చివరికి వచ్చే సరికి "పెనవేయి" అన్న మాట ఎంత బాగా పలుకుతారో ఆ అనుభూతి వింటే గానీ తెలియదు. వేటూరి వారి సాహిత్యం అందంగా అలరిస్తే, రాజన్ నాగేంద్ర గారి సంగీతం ఆహ్లాదకరంగా సాగిపోతుంది. మొత్తం మీద విన్నాక ఒక అందమైన అనుభూతిని మిగిల్చే ఈ పాట మన అందరి కోసం ఇక్కడ, మీరుకూడా విని ఆనందించండి.


పాట వినాలంటే ఇక్కడ నొక్కి వినండి

చిత్రం : ఇంటింటి రామాయణం(1979)
సంగీతం: రాజన్ నాగేంద్ర
సాహిత్యం : వేటూరి
గానం : యస్ పి బాలసుబ్రహ్మణ్యం

మల్లెలు పూసే.. వెన్నెల కాసే.. ఈ రేయి హాయిగా
మల్లెలు పూసే.. వెన్నెల కాసే.. ఈ రేయి హాయిగా
మల్లెలు పూసే.. వెన్నెల కాసే.. ఈ రేయి హాయిగా
మమతలు వేయిగ పెనవేయి నన్ను తీయగా...
మల్లెలు పూసే.. వెన్నెల కాసే.. ఈ రేయి హాయిగా

ముసి ముసి నవ్వులలో గుస గుస లాడినవే...
నా తొలి మొజులే.. నీ విరజాజులై
ముసి ముసి నవ్వులలో గుస గుస లాడినవే...
నా తొలి మోజులే.. నీ విరజాజులై

మిస మిస వన్నెలలో మిల మిల మన్నవిలే
నీ బిగి కౌగిలిలో జాబిలి రాత్రులే
కాటుకలంటుకున్న కౌగిలింత లెంత వింతలె

మనసులు పాడే మంతనమాడే ఈ పూట జంటగా
మమతలు వేయిగ పెనవేయి నన్ను తీయగా...
మల్లెలు పూసే వెన్నెల కాసే ఈ రేయి హాయిగా

హాహా..ఆ..హాహా...హా...ఆ....ఆ.......

తొలకరి కోరికలే తొందర చేసినవే
ఈ విరి శయ్యకే ఆవిరి తీరగా

తొలకరి కోరికలే తొందర చేసినవె
ఈ విరి శయ్యకే ఆవిరి తీరగా
సొగసరి కానుకలే సొద పెడుతున్నవిలే
యే తెర చాటునో ఆ చెఱ వీడగా..
అందిన పొందులోనె అందలేని విందులీయవె

కలలిక పండే కలయిక నేడే కావాలి వేయిగా
మమతలు వేయిగ పెనవేయి నన్ను తీయగా...
మల్లెలు పూసే వెన్నెల కాసే ఈ రేయి హాయిగా

మమతలు వేయిగ పెనవేయి నన్ను తీయగా...
మల్లెలు పూసే వెన్నెల కాసే ఈ రేయి హాయిగా

image courtesy tollywoodsingers.com

ఆదివారం, నవంబర్ 22, 2009

మాలిష్ - మల్లెపువ్వు

రావుగోపాల్రావు గారి గురించి నేను ఇపుడు ప్రత్యేకంగా చెప్పగలిగేది ఏమీ లేదు భీకరమైన రూపం లేకున్నా ఆహర్యం, డైలాగ్ డెలివరీతో ప్రతినాయక పాత్రకి ప్రత్యేక గుర్తింపు తెచ్చారాయన. ముత్యాలముగ్గు సినిమాలో సెగట్రీ అంటూ పరమ కిరాతకమైన డైలాగ్ సైతం నిమ్మళంగా చెప్పి వెన్నులో వణుకు పుట్టించినా, వేటగాడు లో ప్రాసల పరోఠాలు తినిపించినా ఆయనకే చెల్లింది. ఆ ప్రాసలు ఇదిగో ఇక్కడ చూడండి.



ఈ విలనిజం ఒక ఎత్తైతే నాకు ఆయన మంచివాడుగా చేసిన సాధారణమైన, హాస్య పాత్రలు కూడా చాలా నచ్చుతాయి. వాటిలో ఈ మాలీష్ పాత్ర ఒకటి. మల్లెపువ్వు చిత్రం లో గురువా అంటూ శోభన్‍బాబుకు సాయం చేసే ఓ మాలిష్ చేసుకునే మంచివాడి పాత్రలో అలరిస్తారు. ఆ పాత్రలో తన పై చిత్రీకరించిన ఈ పాట నా చిన్నపుడు నాకు నచ్చే హాస్యగీతాలలో ఒకటి. ఇదే తరహా మాలీష్ పాత్రలో ’పట్నంవచ్చిన పతివ్రతలు’ సినిమా లో తాగుబోతుగా మరింత రక్తి కట్టించారు. ఈ సినిమా లో ఇతను మాలీష్ చేయించుకునే వాళ్ళని వాళ్ళ ఊరిని పొగిడి డబ్బులు తీసుకుని ఆ డబ్బుతో తాగి వచ్చి వాళ్ళనీ వాళ్ళ ఊరిని తిడుతూ బోలెడు హాస్యాన్ని అందిస్తారు. నూతన్ ప్రసాద్ ని తిడుతూ అనుకుంటా మీది కాకినాడ అయితే ఏటి మీ కాకినాడ గొప్ప.. మాది బెజవాడ.. దాని గొప్పదనం ముందు మీఊరెంత, మీ ఊళ్ళో సిటీ బస్సులు రోడ్ మీద నడుస్తాయ్ అదే మా బెజవాడ లో మనుషులమీద నుండి నడస్తాయ్ తెలుసా.. అసలు ఎంత గొప్పోడైనా మా బెజవాడ మురుక్కాలవల వెంబడి ముక్కు మూసుకోకుండా నడవగలరా.. అని ఏకి పారేసి నవ్విస్తారు.

ఇలాటిదే ఇంకోటి ’దేవత’ సినిమాలో నరసయ్య బాబాయ్ పాత్ర ఊరిమంచిని కోరుకునే ఊరిపెద్దగా ఉంటూ "కొంపా గోడూ లో కొంప నాకిచ్చేసి గోడు మా బామ్మకిచ్చేయ్.. పొలం పుట్ర లో పొలం నాకిచ్చేసి పుట్ర మా బామ్మకిచ్చేయ్.." అనే ఆకతాయి తో "అలాగే రా మీ ఆస్తీ పాస్తీ పంచేసి ఆస్తి మీ బామ్మకిచ్చేసి పాస్తి నీకిచ్చేస్తాను.." అని మోహన్ బాబు లాంటి ఆకతాయిల ఆటకట్టించే పాత్ర లో అలరిస్తారు. ఇంకా ఘరానా మెగుడు లో చిరు కి గురువు + మామ గారిలా, జానకిరాముడు లోనూ, కొన్ని సినిమాల్లో పెళ్ళాం చాటు మొగుడు గా కూడా కొన్ని పాత్రలు వేసి బాగా ఆకట్టుకున్నారు. ఇంకా కొన్ని సినిమాలు గుర్తు రావడం లేదు. ఏదేమైనా ఈ మాలిష్ పాటలో రావుగోపాల్రావు గారిని చూసి మీరు కూడా ఆనందించండి మరి. పాడినది స్వర ’చక్రవర్తి’ గారట, ఆ స్వరం కూడా హాస్యాన్ని కురిపిస్తుంది.



చిత్రం : మల్లెపువ్వు
సంగీతం : చక్రవర్తి
సాహిత్యం : ఆరుద్ర
గానం : చక్రవర్తి

మాలీష్... మాలీష్...
జుంబాంబ జుంబాంబ బాంబ బాంబ ఝుం
జుంబాంబ జుంబాంబ బాంబ బాంబ ఝుం
అరె హా హా...మాలీష్...
అరె హే హే హో హా మాలీష్...
రాందాస్ మాలీష్...నిమ్నూన్ మాలీష్
చాలంజీ మాలీషు... చాన్నాళ్ళ సర్వీసు...
హెయ్..చాలంజి మాలీషు... చాన్నాళ్ళ సర్వీసు...
రాందాసు మాలీషండోయ్...మాలీష్...
మాలీష్..మాలీష్..మాలీష్....మాలీష్. మా మా....

అరె హా అరె హో
మాలీషు చేస్తుంటె బాలీసు మీద నువ్వు తొంగున్న హాయుంటది...
అరెహా తల మీద చెయ్యేసి జుంబాంబ దరువేస్తె డుం..డుం..డుం...
తల మీద చెయ్యేసి జుంబాంబ దరువేస్తె రంబొచ్చి రమ్మంటదీ...
అరె ఒళ్ళంత జిల్లంటదీ..హా..ఓహో..ఒ అనిపిస్తదీ...
అరె ఒళ్ళంత జిల్లంటదీ...షమ్మ..ఓహో..ఒ అనిపిస్తదీ...
అమ్మ తోడు.. నిమ్మ నూనే...అంట గానే.. తస్సదియ్యా...
అమ్మ తోడు నిమ్మ నూనే...అంట గానే తస్సదియ్యా...
అబ్బోసి తబ్బిబ్బులే....మాలీష్..

మాలీష్... మాలీష్...
రాందాస్ మాలీష్...నిమ్నూన్ మాలీష్
జుంబాంబ జుంబాంబ బాంబ బాంబ ఝుం
జుంబాంబ జుంబాంబ బాంబ బాంబ ఝుం

అరె హో..తల బిరుసు బుఱ్ఱైన మన చేయి పడగానె మహ తేలికైపోతదీ...
అరె హా... పొద్దంత పని చేసి ఒళ్ళంత బరువైతె మాలీషు మందౌతదీ..
అరె సంపంగి నూనుంది రాజ్జా....అరె సమ్మ సమ్మ గుంటాది రాజా..
అరె సంపంగి నూనుంది రాజా...మహ సమ్మ సమ్మ గుంటాది రాజా..
హ చెవిలోన.. చమురేసీ..చెయి మూసి.. గిలకొడితే...హమ్మా....
హబ్బ....చెవిలోన చమురేసి..చెయి మూసి గిలకొడితే సంగీతమినిపిస్తదీ...
సా..సరి..గా..అ మా..పా..మద..పని..మసా...
సరిగమపదనిని..సరిగమపదనిని..సా....

జుంబాంబ జుంబాంబ బాంబ బాంబ ఝుం
జుంబాంబ జుంబాంబ బాంబ బాంబ ఝుం
అరె హో మాలీష్...అరె హో మాలీష్...
హెయ్..చాలంజి మాలీషు... చాన్నాళ్ళ సర్వీసు...
రాందాసు మాలీషండోయ్...మాలీష్...మాలీష్..
రాందాస్ మాలీష్...నిమ్నూన్ మాలీష్

ఆదివారం, అక్టోబర్ 25, 2009

కుహు కుహూ కూసే కోయిల

కొన్ని పాటలు వింటున్నపుడు ఆ పాటలు మనం మొదటి సారి విన్నప్పటి పరిస్థితులు లేదా ఆ పాటను తరచుగా విన్నప్పటి పరిస్థితులు అలా సినిమా రీళ్ళలా కదులుతూ ఉంటాయి. పాట తో పాటు అప్పటి వాతావరణం, పక్కన ఉన్న వ్యక్తులు, ఙ్ఞాపకాలూ అన్నీ కాన్వాస్ పై అలా కదులుతుంటాయి. నాకైతే ఒకోసారి ఆ సమయం లో పీల్చిన గాలి తో సహా గుర్తొస్తుంటుంది. ఈ పాట అలాటి పాటలలో ఒకటి. ఎనభైలలో విజయవాడ వివిధభారతి కార్యక్రమం లో తరచుగా వినే ఈ పాట ముందు వచ్చే కోయిల కుహు కుహు లూ, అందమైన సంగీతం విన్న మరుక్షణం ఏదో తెలియని మధురమైన అనుభూతికి లోనవుతాను. సాయంత్రం మొక్కలకు నీళ్ళుపోసేప్పుడు అప్పటి వరకూ ఎండకి ఎండిన మట్టి నుండి వచ్చే మధురమైన సువాసన ముక్కుపుటాలకు తాకిన అనుభూతికి గురౌతాను.

పాట రాసినది వేటూరి గారే అనుకుంటాను నెట్ లో వెతికితే ఆయన పేరుతోనే దొరికింది. మంచి సాహిత్యానికి, ఆహ్లాదకరమైన బాణీ , దానికి తేనెలూరు కోయిల గొంతు లాంటి జానకి గారి గాత్రం తోడైతే సంగీత ప్రియులకు పండగే కదా మరి.. ఇంతవరకూ ఈ పాట నేను వీడియో లో చూడలేదు, అప్పట్లో రేడియో లోనూ ఇప్పుడు ఆన్లైన్ లోనూ వినడమే, చాలా ఆహ్లాదకరమైన పాట మీరూ విని ఆనందించండి.

01 Kuhu kuhu koose...


చిత్రం : డబ్బు డబ్బు డబ్బు
గానం : జానకి
సంగీతం : శ్యాం
సాహిత్యం : వేటూరి

కుహు కుహూ.. కూసే.. కోయిల నాతో నీవు వచ్చావని..
నీతో వసంతాలు తెచ్చావని...
బాగుందటా... జంటా బాగుందటా..
పండాలటా... మన ప్రేమే పండాలటా..

కుహు కుహూ... కుహు కుహూ...

నీడగ నీ వెంట నే జీవించాలంట...ఓ ఓ ఓ.. ఓ బావా
నీడగ నీ వెంట నే జీవించాలంట...ఓ ఓ ఓ.. ఓ బావా
నీహృదయం లోన.. మరుమల్లెల వానా..
నీహృదయం లోనా.. మరుమల్లెల వానా..
కురిసి..మురిసి..పులకించాలంటా...
కురిసీ..మురిసీ..పులకించాలంటా...

కుహు కుహూ... కుహు కుహూ...

గుండెల గుడిలోనా... నా దైవం నీ వంటా...ఓ ఓ ఓ.. ఓ బావా
గుండెల గుడిలోనా... నా దైవం నీ వంటా...ఓ ఓ ఓ.. ఓ బావా
నీ కన్నుల వెలిగే.. హారతి నేనంట..
నీ కన్నుల వెలిగే.. హారతి నేనంట..
కలసి... మెలసి... తరియించాలంట...
కలసీ... మెలసీ... తరియించాలంట...

కుహు కుహూ.. కూసే.. కోయిల నాతో నీవు వచ్చావని..
నీతో వసంతాలు తెచ్చావని...
బాగుందటా... జంటా బాగుందటా..
పండాలటా... మన ప్రేమే పండాలటా..

శుక్రవారం, అక్టోబర్ 16, 2009

నీవుంటే -- స్నేహం (1977) by Bapu

ఈ సినిమా ను దానిలోని పాటలను తన వ్యాఖ్యల ద్వారా నాకు పరిచయం చేసిన కృష్ణగీతం బ్లాగర్ భావన గారికి, పాటలను అందించిన స్వరాభిషేకం బ్లాగర్ రమేష్ గారికి, తృష్ణవెంట బ్లాగర్ తృష్ణ గారికి, దీప్తిధార బ్లాగర్ సిబిరావు గారికి ధన్య వాదాలు తెలుపుకుంటూ, ఇంత మంచి పాటలను నా బ్లాగ్ లో పెట్టకుండా ఉండలేక ఈ పాటల సాహిత్యాన్నీ, వినడానికి వీలుగా వీడియో మరియూ ఆడియో లింకు లను ఇక్కడ పొందుపరుస్తున్నాను. అందరికి మరో మారు ధన్యవాదాలు. నీవుంటే వేరే కనులెందుకూ అంటూ సాగే పాట పల్లవి ఎంత మధురంగా ఉందో.. సినారే గారికి నిజంగా హ్యాట్సాఫ్. ఆహ్లాదకరమైన సంగీతాన్నందించిన కె.వి.మహదేవన్ గారికి డబల్ హ్యాట్సాఫ్...



చిత్రం : స్నేహం.
సంగీతం : కె.వి.మహదేవన్.
సాహిత్యం : సి.నారాయణరెడ్డి.
గానం: యస్.పి. బాలసుబ్రహ్మణ్యం

నీవుంటే వేరే కనులెందుకూ
నీ కంటె వేరే బ్రతుకెందుకూ
నీ బాటలోని.. అడుగులు నావె
నా పాటలోనీ.. మాటలు నీవె

||నీవుంటె వేరే కనులెందుకూ
నీ కంటె వేరే బ్రతుకెందుకూ
నీ బాటలోని.. అడుగులు నావె
నా పాటలోనీ.. మాటలు నీవె
నీవుంటే వేరే కనులెందుకూ||

నా ముందుగ నువ్వుంటే తొలిపొద్దు
నువ్వు చెంతగ లేకుంటే చీకటీ
నా ముందుగ నువ్వుంటే తొలిపొద్దు
నువ్వు చెంతగ లేకుంటే చీకటీ
నీ చేయి తాకితే..తీయని వెన్నెల
చేయి తాకితే.. తీయని వెన్నెల
అలికిడి వింటేనే తొలకరి ఝల్లు

||నీవుంటే వేరే..||

నిన్న రాతిరి ఓ.. కలవచ్చిందీ
ఆ కలలో ఒక దేవత దిగివచ్చిందీ
నిన్న రాతిరి ఓ..కలవచ్చిందీ
ఆ కలలో ఒక దేవత దిగివచ్చిందీ
చందమామ కావాలా.. ఇంద్రధనవు కావాలా
అమ్మ నవ్వు చూడాలా.. అక్క ఎదురు రావాలా
చందమామ కావాలా.. ఇంద్రధనువు కావాలా
అమ్మ నవ్వు చూడాలా.. అక్క ఎదురు రావాలా
అంటు అడిగిందీ దేవత అడిగిందీ
అప్పుడు నేనేమన్నానో తెలుసా

వేరే కనులెందుకనీ నీకంటే..వేరే బ్రతుకెందుకనీ
లాలాల లాల లలలలలాల...
లాలాల లాల లలలలలాల.

*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*
ఇదే చిత్రం లోని మరో అందమైన పాట


చిత్రం: స్నేహం
సంగీతం : కెవి మహదేవన్
సాహిత్యం : ఆరుద్ర
గానం : బాలసుబ్రహ్మణ్యం

నవ్వు వచ్చిందంటే కిలకిల
ఏడుపొచ్చిందంటె వల వల ||నవ్వు||
గొదారి పాడింది గల గలా.. ||2||
దానిమీద నీరెండ మిల మిల

||నవ్వు వచ్చిందంటే||

నది నిండా నీళ్ళు ఉన్నా మనకెంత ప్రాప్తమన్నా(2)
కడవైతే కడివెడు నీళ్ళే గరిటైతే గరిటెడు నీళ్ళే(2)
ఎవరెంత చేసుకుంటే...
ఎవరెంత చేసుకుంటే అంతే కాదా దక్కేది

నవ్వు వచ్చిందంటే కిలకిల
ఏడుపొచ్చిందంటె వల వల..

ధర తక్కువ బంగారానికి ధాటి ఎక్కువ
నడమంత్రపు అధికారానికి గోతులెక్కువా ఆ అ ఆఆఅ
ధర తక్కువ బంగారానికి ధాటి ఎక్కువ
నడమంత్రపు అధికారానికి గోతులెక్కువా
కొత్త మతం పుచ్చుకుంటె గుర్తులెక్కువ
చేతకానమ్మకే చేష్టలెక్కువ
చెల్లని రూపాయికే గీతలెక్కువా

నవ్వువచ్చిందంటే కిలకిల
ఏడుపొచ్చిందంటె వల వల..

తమసొమ్ము సొమవారం ఒంటిపొద్దులుంటారు
మందిసొమ్ము మంగళవారం ముప్పొద్దుల తింటారు
తమసొమ్ము సొమవారం ఒంటిపొద్దులుంటారు
మందిసొమ్ము మంగళవారం ముప్పొద్దుల తింటారు
పరులకింత పెట్టినదే
పరులకింత పెట్టినదే పరలోకం పెట్టుబడి
నవ్వు వచ్చిందంటే కిలకిల
ఏడుపొచ్చిందంటె వల వల
గోదారి పాడింది గల గల
కధలెన్నొ చెప్పింది ఇలా ఇలా...

నవ్వు వచ్చిందంటే కిలకిల
ఏడుపొచ్చిందంటె వల వల
నవ్వు వచ్చిందంటే కిలకిల
ఏడుపొచ్చిందంటె వల వలా


యూట్యూబ్ వీడియో అందచేసిన hyderabadee గారికి ధన్యవాదాలు.

గురువారం, అక్టోబర్ 15, 2009

ఓ రెండు హాస్య సన్నివేశాలు..

యాతమేసి తోడినా ఏరు ఎండదు అంటూ నిన్న విషాదం లో ముంచేశాను కదా, నా బ్లాగ్ లో మరీ ఇంత విషాదాన్ని మొదటి పేజి గా ఉంచడం ఇష్టం లేక నాకు నచ్చిన ఓ రెండు హాస్య సన్నివేశాలను ఇక్కడ ఉంచుతున్నాను. మొదటిది "బావగారు బాగున్నారా" సినిమా లోనిది. ఇందులో బ్రహ్మం హాస్యం అలరిస్తుంది, దాని తర్వాత నాకు నచ్చే హాస్యం కోట శ్రీనివాసరావు, శ్రీహరి కాంబినేషన్ లోనిది. ప్రత్యేకించి ఈ సన్నివేశం లో శ్రీహరి మూత తీయడానికి నానా హైరానా పడుతుంటే కోట పక్కనుండి "నరం బెణుకుద్ది.. నరం బెణుకుద్ది..." అని శ్రీహరితో అనే మాటలు, "తీసేస్తాడు.. తీసేస్తాడు.." అంటూ శ్రీహరిని సమర్ధిస్తూ చెప్పే డైలాగ్స్ నవ్వు తెప్పిస్తాయి. ఇంకా చివర్లో "నా వెదవతనం తో పోలిస్తే నీ వెదవతనం ఒక వెదవతనమట్రా.." లాంటి మాటలతో ఇద్దరూ భలే నవ్విస్తారు. ఈ సినిమాకి వీరిద్దరి హాస్యం ప్రత్యేక ఆకర్షణ.



ఇక రెండవది మెగాస్టార్ మరో ఫ్లాప్ మూవీ "డాడీ.." లోనిది. నటీ నటులు అంతా సీరియస్ గా మాట్లాడుతూనే మనల్ని భలే నవ్వించేస్తారు. మిస్ కమ్యునికేషన్ ఎలాంటి గజిబిజి కి దారి తీస్తుందో ఈ సన్నివేశం ఒక ఉదాహరణ. ఇంచు మించు ఇలాంటిదే మిమిక్రీ కేసట్ లలో ఒక జోక్ వినిపిస్తారు. అది రెండు రేడియో స్టేషన్ లు ఒక రేడియో స్టేషన్ లో వచ్చే పశువుల పెంపకం మరో స్టేషన్ లో వచ్చే సౌందర్య పోషణ రెండు మిక్స్ అయిపోయి పండించే హాస్యం సన్నివేశం. ఇక ఈ సన్నివేశం కాస్త ఇబ్బందికరం గా అనిపించినా మంచి హాస్యాన్ని అందిస్తుంది. సన్నివేశానికి ఉపోద్ఘాతం ఏమిటంటే యంయస్. నారాయణ & కో తీసే మోటార్ బైక్ యాడ్ లో నటించడానికి ఒక హీరో కావాలని అతనిని ఇంటికి రమ్మని చెప్పి అతని కోసం ఎదురు చూస్తుంటారు, అదే సమయం లో చిరు, రాజేంద్ర ప్రసాద్ అద్దె ఇంటికోసం వస్తారు, ఇక మీరే చూసి నవ్వుకోండి.




యూట్యూబ్ వీడియో అందించిన తెలుగుఒన్ మరియూ gani000 లకు ధన్యవాదాలు.

బుధవారం, అక్టోబర్ 14, 2009

యాతమేసి తోడినా..

జాలాది గారి కలం నుండి జాలువారిన ఈ పాట నాకు నచ్చిన పాటల్లో ఒకటి, మొన్న ఈటీవీ ఝుమ్మంది నాదం కార్యక్రమం లో బాలు గారు ఈ పాట గురించి చెప్పిన దగ్గర నుండి నన్ను మరింత గా వెంటాడుతుంది, సరే బ్లాగేస్తే ఓ పనైపోతుంది లే అని ఈ ప్రయత్నం. చిన్నతనం లో నేను రామారావు కి వీర ఫ్యాన్ కం ఏసి ని. అయితే నేను ఆరోతరగతి లోనో ఏడులోనో ఉన్నపుడు అప్పట్లో కాలేజి లో చదివే మా జోసఫ్ బావ "ఠాట్ రామారావు ఏంటిరా వాడు ముసలోడు అయిపోయాడు ఇప్పుడు అంతా చిరంజీవిదే హవా, ఖైదీ చూశావా, గూండా చూశావా, సూపర్ డ్యాన్స్ లు ఫైట్ లు గట్రా..." అని ఫుల్ ఎక్కించేసి చిరు సినిమాలు చూపించేసి నన్ను చిరంజీవి ఫ్యాన్ గా మార్ఛేశాడు. మా బావ మాటల ప్రభావంతో సినిమాలు చూసిన నేను కూడా ఆహా కేక అని మురిసిపోయాను అప్పట్లో కానీ తర్వాత తర్వాత నిజంగా నచ్చేశాడు అనుకోండి అది వేరే విషయం.

ఆ సమయం లోనే చిరంజీవి మొదట నటించిన సినిమా గా ప్రాణం ఖరీదు గురించి తెలుసు అంతే కానీ ఇక ఆ సినిమా గురించిన వివరాలు ఏమీ తెలియవు. ఎనిమిదిలో ఉన్నపుడనుకుంటా రేడియోలో ఈ పాట వేస్తే అహా మా చిరంజీవి సినిమా పాట సూపర్ అని చెవులు రిక్కించి విన్నాను. ఉన్న తుప్పొదిలి పోయింది, ఒక్క సారి చిరు ని ఇలా చెట్టుకు ఆనుకుని కూర్చుని ఈ పాట పాడుతున్నట్లు కొంచెం ఊహించుకుని.. ఒద్దులే మన డ్యాన్సింగ్ హీరోని ఇలా ఊహించుకోడం కష్టం అని మానేశా.. కానీ చిన్నప్పటి నుండి మనకి ఏడుపు పాటలు స్లో సాంగ్స్ అంటే ఉన్న ఇష్టం వల్ల పాట ట్యూన్ అలా మనసులో గుర్తుండి పోయింది. నిజం చెప్పద్దూ అప్పుడు అసలు సాహిత్యం గురించి పట్టించు కోలేదు.

కానీ మరి కాస్త ఊహ తెలిసాక జాలాది గారు ఉపయోగించిన జానపదాలు వాటిని బాలు తన స్వరం లో పలికించిన తీరు నన్ను బాగా ఆకట్టుకున్నాయి. ఇక అప్పటి నుండి ఎందుకు రా ఈ ఏడుపు పాట అని ఎందరు అన్నా నేను తరచుగా వినే పాటల్లో ఇదీ ఒకటైంది. జాలాది గారు చిన్న చిన్న పదాలతో లోతైన భావాన్ని అవలీలగా పలికించేశారు. సాధారణంగా చక్రవర్తి గారి సంగీతం అనగానే మంచి మాస్ బీట్ సాంగ్స్ మొదట గుర్తొస్తాయి కానీ ఈ పాట సంగీతం ఒక సారి గమనించండీ ఆహా మన చక్రవర్తి గారేనా అనిపిస్తుంది. ఇంచుమించు ఇవే మాటలు మొన్న బాలు గారు కూడా అన్నారు. ఈ సినిమా గురించి నేను ఇపుడే తెవికి లో చదివి తెలుసుకున్నాను కథ పెద్ద ఆసక్తి కరంగా ఏమీ లేదు, మరి హిట్టో ఫ్లాపో తెలీదు. ఏదేమైనా ఓ మంచి పాట మీ కోసం.




చిత్రం : ప్రాణం ఖరీదు
సంగీతం : చక్రవర్తి
సాహిత్యం : జాలాది
గానం : యస్.పి.బాలసుబ్రహ్మణ్యం.

యాతమేసి తోడినా ఏరు ఎండదూ...
పొగిలి పొగిలి ఏడ్సినా పొంత నిండదూ...
||యాతమేసి||
దేవుడి గుడిలోదైనా పూరి గుడిశ లోదైనా
గాలి ఇసిరి కొడితే...
ఆ దీపముండదు ఆ దీపముండదు

||యాతమేసి తోడినా||

పలుపు తాడు మెడకేస్తే పాడి ఆవురా...
పసుపు తాడు ముడులేస్తే ఆడదాయె రా...
||పలుపు తాడు||
కుడితి నీళ్ళు పోసినా...అది పాలు కుడుపుతాదీ...
కడుపు కోత కోసినా...అది మనిషి కే జన్మ ఇత్తాదీ...
బొడ్డు పేగు తెగిపడ్డా రోజు తలుసుకో...
గొడ్డు కాదు ఆడదనే గుణం తెలుసుకో...

||యాతమేసి తోడినా||

అందరూ నడిసొచ్చిన తోవ ఒక్కటే...
సీము నెత్తురులు పారే తూము ఒక్కటే...
||అందరూ||
మేడ మిద్దెలో ఉన్నా... సెట్టునీడ తొంగున్నా...
నిదర ముదర పడినాకా...
పాడె ఒక్కటే వల్లకాడు ఒక్కటే...
కూత నేర్సినోళ్ళ కులం కోకిలంట రా..
ఆకలేసి అరిసినోళ్ళు కాకులంట రా...

||యాతమేసి తోడినా||


యూట్యూబ్ వీడియో అందించిన amritar83 గారికి ధన్యవాదాలు.

సోమవారం, సెప్టెంబర్ 28, 2009

తల ఎత్తి జీవించు -- మహాత్మ

క్రియేటివ్ కృష్ణవంశీ దర్శకత్వం లో వస్తున్న శ్రీకాంత్ వందవ చిత్రం "మహాత్మ" లో సిరివెన్నెల గారు రచించిన ఈ రెండు పాటలూ, విన్న వెంటనే బాగున్నాయి అనిపించి బ్లాగ్ లో పెట్టేయాలనిపించింది. ఈ లిరక్స్ ని మా ఆర్కుట్ కమ్యునిటీ లో కష్టపడి టైప్ చేసి ముందే పోస్ట్ చేసిన ఫణి గారికి ధన్యవాదాలు తెలుపుకుంటూ స్వల్ప మార్పులతో ఇక్కడ మీ కోసం. "ఇందిరమ్మ ఇంటి పేరు కాదుర గాంధీ" పాట లో "సూర్యుడు అస్తమించని రాజ్యానికి పడమర దారిని చూపిన క్రాంతి" లాటి పంక్తులు రాయడం సిరివెన్నెలగారికే చెల్లింది. పాట వినాలంటే సీడీ కొనడం సక్రమమైన పద్దతి :-) కానీ ఇది ఇప్పటికే ఆన్లైన్ లో దొరుకుతుంది కనుక లింక్ ఇస్తున్నాను. ఒక సారి విని, మిగిలిన పాటలు కూడా నచ్చితే సీడీ కొనండి. నేను ఈ రెండు తప్ప వేరేవి ఇంకా వినలేదు.


మహాత్మ చిత్రం లోని పాటల కోసం ఇక్కడ క్లిక్ చేయండి. "తల యెత్తి జీవించు" పాట మొదటి నుండి నాలుగవది, మహాత్ముని పై రాసిన "ఇందిరమ్మ ఇంటిపేరు" పాట మొదటిది.

చిత్రం: మహాత్మా
సాహిత్యం: సిరివెన్నెల
సంగీతం: విజయ్ ఆంటోని
గానం: బాలసుబ్రహ్మణ్యం

సింగమ్ము పై తిరుగు పురుష కేసరి శాతవాహనుడు పూర్వజుడు నీ జాతికీ

తల ఎత్తి జీవించు తమ్ముడా
తెలుగు నేలలో మొలకెత్తినాననీ
కనుక నిలువెత్తుగా ఎదిగినాననీ

తల వంచి కైమోడ్చు తమ్ముడా
తెలుగు తల్లి నను కని పెంచినాదని
కనుక తులలేని జన్మమ్ము నాదని
త్రైలింగ ధామం...త్రిలోకాభిరామం
అనన్యం...అగణ్యం...ఏదో పూర్వపుణ్యం
త్రిసంధ్యాభివంద్యం....అహో జన్మ ధన్యం

||తల ఎత్తి||

శ్రీ మహావిష్ణువే శ్రీకాకుళాంధ్రుడై శ్రీకారమును చుట్టె నీ చరితకి
శ్రీశైల భీమేశ కాళేశుడై హరుడు ప్రాకారము కట్టె నీ సీమకి
సింగమ్ము పై తిరుగు పురుష కేసరి శాతవాహనుడు పూర్వజుడు నీ జాతికీ
పడతి సీతమ్మతో రామయ్య కొలువైన పంచవటి చాలు నీ ప్రఖ్యాతికి

||తల ఎత్తి||

తరతరమ్ములు దాటి తరలివచ్చిన మహాత్ములతపః సంపత్తి నీ వారసత్వం
ఇచట పుట్టిన చిగురు కొమ్మైన చేవయని ఆంధ్రులకు అందినది ఆర్య సత్వం
మువ్వన్నె జెండాగ మిన్నంటి లోకాన మేటి సంస్కృతి చాటు ఘనత నీ స్వంతం
భారతాంబకు పెద్ద కొడుకుగా మనగలుగు ఆత్మ గౌరవముతో వర్ధిల్లు నిత్యం

||తల ఎత్తి||

~*~*~*~*~*~*~*~*~*~*~*~*~*~*~*~*~*~*~*~*~*~*~*~*~*~

చిత్రం: మహాత్మా
సాహిత్యం: సిరివెన్నెల
సంగీతం: విజయ్ ఆంటోని
గానం: బాలసుబ్రహ్మణ్యం

రఘుపతి రాఘవ రాజారాం
పతీత పావన సీతారాం
ఈశ్వర్ అల్లా తెరో నాం
సబ్ కో సన్మతి దే భగవాన్

ఇందిరమ్మ ఇంటిపేరు కాదుర గాంధీ
ఊరికొక్క వీధి పేరు కాదుర గాంధీ

||ఇందిరమ్మ||

కరెన్సీ నోటు మీద
ఇలా నడి రోడ్డు మీద
మనం చూస్తున్న బొమ్మ కాదుర గాంధీ
భరతమాత తలరాతను మార్చిన విధాతరా గాంధీ
తరతరాల యమయాతన తీర్చిన వరదాతర గాంధీ

||ఇందిరమ్మ||

రామనామమే తలపంతా
ప్రేమధామమే మనసంతా
ఆశ్రమ దీక్ష., స్వతంత్ర కాంక్ష
ఆకృతి దాల్చిన అవధూత
అపురూపం ఆ చరిత
ధర్మయోగమే జన్మంతా
ధర్మక్షేత్రమే బ్రతుకంతా
సంభవామి అని ప్రకటించిన అలనాటి కృష్ణ భగవద్గీత ఈ బోసినోటి తాతా
మన లాగే ఒక తల్లి కన్న మాములు మనిషి కదరా గాంధీ
మహాత్ముడంటూ మన్నన పొందే స్థాయికి పెంచద ఆయన స్ఫూర్తి
సత్య అహింసల మార్గ జ్యోతి
నవ శకానికే నాంది

||రఘుపతి|| ||రఘుపతి||

గుప్పెడు ఉప్పును పోగేసి
నిప్పుల ఉప్పెనగా చేసి
దండి యాత్రనే దండయాత్రగా
ముందుకు నడిపిన అధినేత
సిసలైన జగజ్జేత
చఱఖా యంత్రం చూపించి
స్వదేశీ సూత్రం నేర్పించి
నూలుపోగుతో మదపుటేనుగులను బంధించాడురా జాతి పితా సంకల్ప బలం చేత
సూర్యుడు అస్తమించని రాజ్యానికి పడమర దారిని చూపిన క్రాంతి
తూరుపు తెల్లారని నడిరాతిరికి స్వేచ్ఛా భానుడి ప్రభాత కాంతి
పదవులు కోరని పావన మూర్తి
హృదయాలేలిన చక్రవర్తి
ఇలాంటి నరుడొకడు ఇల తలంపై నడయాడిన ఈనాటి సంగతీ
నమ్మరానిదని నమ్మక ముందే ముందు తరాలకు చెప్పండి

సర్వజన హితం నా మతం
అంటరానితనాన్ని అంతః కలహాలనీ
అంతం చేసేందుకే నా ఆయువంతా అంకితం

హే రాం !!

ఆదివారం, సెప్టెంబర్ 27, 2009

లేడీస్‍టైలర్ -- హాస్య సన్నివేశం

ఎంత పాటల బ్లాగ్ అయితే మాత్రం అస్తమానం పాటలే వినిపిస్తే రొటీన్ అయిపోద్దని కాస్త వెరైటీ గా ఈ రోజు హాస్య సంభాషణ వినిపిద్దాం అని ఓ చిన్న ప్రయత్నం. లేడీస్ టైలర్ లోని ఈ హిందీ పాఠం సీన్ చూసి నవ్వుకోని వారు ఉండరంటే అతిశయోక్తి కాదేమో. వంశీ గారి దర్శకత్వం లో మాటల రచయిత తనికెళ్ళ భరణి హిందీ తో చేసిన మాటల గారడి ఇక్కడ... అప్పుడప్పుడూ చూసి రిలాక్స్ అవ్వి నవ్వుకోడానికి సరదాగా బాగుంటుంది అని...



హె హె అదీ..
అబ్ టైం క్యాహువా..
మై కబ్ ఆనేకు కహే ఆప్ కబ్ ఆయే..
అగర్ రోజ్ అయిసే హీ దేర్ కరే తొ ముఝ్ సే నహీ హోగా..

ఓహో ఇవ్వాళ హిందీ పాఠం గావల్ను.
బీచ్ మే అసిస్టెంట్ సీతారాముడు హై ఓ ఖాతా హై.. ఇంకానేమో
బట్టల సత్యం హై, శీనూ భీ హై ఓ ఢరాతా హై… బెదిరిస్తాడండీ.. ఇసీలియే మై హిందీ మే...
ఆపూ..
నేమాట్లాడింది హిందీ కాదాండి.
ఇది హిందీయా ఇది వింటే హిందీ ని అర్జంట్ గా రాజభాష గా రద్దుచేస్తారు.
ఈ సారి లేట్ గా వచ్చావా తోలు వలిచేస్తాను.. చమడా నికాల్దూంగీ సమజ్ గయా..
ఆ గయా గయా తెలుగులో వలిచారు కదండీ ఇంక హిందీ లో కూడా ఎందుకులెండి.
అసలు ఏ భాషైనా నేర్చుకోవాలంటే దాని మీద ధ్యాసుండాలి, విదేశీయుడైన జాన్ హిగ్గిన్స్ భాగవతార్ తెలుగు నేర్చుకుని త్యాగరాయ కృతులు పాడారు, సిగ్గేయడం లేదు.
సిగ్గెందుకండీ మన భాష పదిమందీ నేర్చుకుంటున్నారని అ.ఆ గర్వపడాలి గానీ..
Shutup
బ్రౌన్ దొర వేమన పద్యాలని సంస్కరించి తెలుగులో నిఘంటువు కూడా రాశాడు మనకి మనభాషే సవ్యంగా వచ్చి చావదు ఇక పరాయి భాషా.. హా... సరే సరి..
ఏవండీ మరీ అంత ఇదిగా తిట్టకండి.. తల్చుకుంటే నేనూ నేర్చుకోగలను జహి జందీ..
ఆ...
అదే హిందీ
ఓహో హిందీ లో నలుపుని ఏమంటారో చెప్పు..
కవ్వా..
కవ్వా అంటే కాకి..
కాకి నలుపే కదండీ.. హి..
సంతోషించాం. ఆ... ఉంగరాన్నేమంటారూ..
అంగూటీ..
హమ్మయ్యా.. మరి బొంగరాన్ని..
లంగూటీ..
నీ బొంద లట్టూ అంటారు.
అదేదో తినేదన్నట్లు గుర్తు
సుందరం సుందరం నీకీ జన్మకి హిందీ రాదు చదువురాదు. నన్నొదిలేయరాదూ..
వదిలేయడమా మిమ్మల్నా చచ్చినా వదల్ను దొరక్క దొరక్క దొరికారు. ఎన్ని వెతికానూ ఎంత వెతికాను మీరు గనక కాదంటే మీ జడకి ఉరేస్కుని చచ్చిపోతాను. ఏదీ మీ జడ ఇది జడా కాదు జతోజడ..
పాఠం..
పాఠాన్దేముందండీ వెదవ పాఠం గైడ్లు కొనుక్కొని చదువుకోవచ్చు.. కానీ మీలాంటి టీచర్ నాలాంటి స్టూడెంట్ మనిద్దరి మధ్యా ఉన్న అవినావాభావ సంబంధం. మీరలా పాఠం చెప్తుంటే నా దృష్టంతా దానిమీదే ఉంది..
దేనిమీదా..
అదే పాఠం మీద దాన్నే జపరే జమ అంటారు.
జపరే జమ ఎంటి..
హిందీ మాష్టారు అయుండి జపరే జమ అంటే కూడా తెలియదా...
జపరే .. జపించరా... జమా దొరుకుతుందీ...
అయ్ బాబోయ్ హిందీ గంగలా పొంగుకుంటూ వచ్చేస్తుంది....
సుజాతా మై మర్ జాతా.. తుమారా చుట్టూ ఫిర్ జాతా.. అది నా తలరాత...
మై పడా తుమ్హారీ తొడా... మచ్చా బహుత్ అఛ్చా...
మై బచ్చా బట్టల సత్యం లుచ్చా..
సుజాతా మై తుమ్ కో ప్రేమ్ కర్తాహూ..
మై నిజం బోల్తాహూ...
మనిద్దరం పెళ్ళిచేస్కుని ఈ ఊర్నుంచీ ఉడ్ జాతా హై...
అప్పుడు శుక్ర మహర్దశ... చక్ర్ ఫిర్ ఆతా....
ఆ ఎక్కడ... ఎక్కడ...
ఇక్కడే... నాయనా నీ హిందీ వింటే జీవితం మీదే విరక్తి కలుగుతుంది.
ఛీ లెక్కల్ తీయ్...
లెక్కలా..ఈ లెక్కలేంటండీ బాబు.. ఎప్పుడు చూసినా లెక్కలు ఖగోళ శాస్త్రం చరిత్రేనా మనిషి వాడి మచ్చ గురించి పట్టించుకునే పని లేదా...
మచ్చా...
ఆ అదే మనిషన్న తర్వాత మచ్చ లేకుండా బతకాలి కదండీ.. అందుకని..
ఇపుడూ రోజూ మీరు నాకు పాఠాలు నేర్పుతున్నారు కదా..
గురుదక్షిణ గా ఇవ్వాళ నేను మీకు కుట్టు నేర్పనా..
కుట్టుని హిందీ లో సీనా అంటారు ఇంగ్లీష్ లో ఇచ్చింగ్ అంటారు..
ఇచ్చింగ్ కాదు స్టిచ్చింగ్...
అదేనండీ బాబు ఒప్పేసుకున్నారు కదా...

సోమవారం, సెప్టెంబర్ 21, 2009

తారలు దిగి వచ్చిన వేళా

నిన్న సెప్టెంబరు 21 న అక్కినేని గారు తన పుట్టిన రోజు జరుపుకున్న సంధర్భంగా అనుకుంటాను. ఒక టీవీ చానల్ వారు ప్రేమాభిషేకం సినిమా వేసారు. అప్పటి వరకూ రిమోట్ లో ఛానల్ బటన్ కి నా వేలికి పోటీ పెట్టి పందెం వేసి ఆడుకుంటున్న వాడ్ని హఠాత్తుగా ఈ పాట వినపడటం తో అక్కడే ఆగిపోయాను... ఈ సినిమా రిలీజ్ అయిన సమయం లో నేను చాలా చిన్న వాణ్ణి కాని అప్పుడప్పుడే కాస్త ఊహ తెలుస్తుంది. సినిమాల్లో యన్టీఆర్ గారి ఎయన్నార్ గారి స్టెప్పు లు ఇంట్లో వేసి అందరిని అలరించే రోజులు అనమాట. నాన్న నా టాలెంట్ కి ముచ్చట పడి ఒక బెల్ బోటం ప్యాంటు కుట్టిస్తే మనం అదేసుకుని వీర లెవల్ లో హీరోలా ఫీల్ అయి అన్నగారి స్టెప్పులు తెగ వేసే వాళ్ళం.

సరే ఇక ఈ పాట విషయానికి వస్తే నాకు చాలా ఇష్టమైన పాట అప్పట్లో అంతగా తెలిసేది కాదు కానీ సెకండ్ రిలీజ్ లో చూసినపుడు ఈ పాట తెగ నచ్చేసింది. తారలు దిగి వచ్చిన వేళా అంటూ సాగే పాట కి మొదట చక్రవర్తి గారు పలికించే మ్యూజిక్ దాని కి అణుగుణంగా కెమెరా ఎవరో కానీ పెళ్ళికి అలంకరించిన దీపాలనే తారలు గా అద్భుతం గా చూపించారు అనిపించింది. కావాలంటే మీరూ ఓ సారి వీడీయో లో మొదట వచ్చే సీన్స్ చూడండి. ఇక ప్రారంభం లో వొచ్చే బాలు గారి ఆలాపన నాకు చాలా ఇష్టం. అప్పట్లో కాస్త ప్రాక్టీస్ చేసి నేర్చేసుకున్నా కూడా.. ఇంకా ఈ పాట చూశాక మనం కూడా ఏయన్నార్ లా సూటూ బూటు వేసుకుని స్టైల్ గా ఇలా సైడాంగిల్ లో లుక్కులిస్తూ పాట పాడేయాల్రా అని ఓ కోరిక కూడా ఉండేది. మా దోస్తుల్లో కొందరైతే ఈ సినిమా హీరో లా మనక్కూడా క్యాన్సర్ ఉంటే బాగుండు అని అనుకున్నవాళ్ళూ లేకపోలేదు కాని నేనసలే ఇంటిలిజెంట్ కదా అలాటి పిచ్చి కోరికలు కోరితే ఇంట్లో బడిత పూజ చేస్తారు అని తెలుసు కాబట్టి సైలెంట్ గా ఉన్నా :-)

ఇంక ఈ సినిమా గురించి చెప్పాలంటే మాటలు చాలవు. కాస్త ఓవర్ యాక్షన్ భరించ గలిగితే ఈ సినిమాను తెగ ఎంజాయ్ చేయచ్చు. అక్కినేని వారు మొదటి భాగం లో ’హే దేవీ..’ అనుకుంటూ ఎంత ఉషారుగా ప్రేమించేస్తారో జబ్బు గురించి తెలిసాక అంతే విషాదంగా ఆకాశం లోకి చూస్తూ త్యాగం చేసేసి అలరిస్తారు. ఈ సినిమా డైలాగుల క్యాసెట్ మా ఇంట్లో చాలా రోజులే నలిగింది. అందుకే నిన్న సినిమా చూస్తూంటే డైలాగులు వింటుంటే ఒక్కసారి అప్పటి ఙ్ఞాపకాల లోకి వెళ్ళి పోయాను. సినిమా మొదట్లో వచ్చే వాటికన్నా జయసుధ ఇంట్లో ఉండే డైలాగులు కేక. శ్రీదేవి వచ్చినప్పటివి కానీ.. అక్కినేని జయసుధ తో తను ఒంటరి వాడిని కానని మరణం గురించి చెప్తూ "ఒకో సారి కిందుంటుంది ఒకోసారి పై నుంటుంది ఒకోసారి ముందుంటుంది ఒకోసారి వెనకుంటుంది.." అనే సంభాషణలు కానీ అక్కినేని గారి నోటివెంట విని తీరాల్సిందే..

నిజానికి ఈ సినిమాలో పేరు తెచ్చుకున్న పాటలు బోల్డు కానీ నాకు ఈ పాట అంటే చాలా ఇష్టం. ఇంకా వేరే పాటలు అంటే.. మా ఊరి పాట "కోటప్ప కొండకు వస్తానని మొక్కుకున్నా.." ఈ పాట కోటప్ప కొండ తిరునాళ్ళ లోనే తీసారు అని చెప్పుకునే వాళ్ళు అప్పట్లో కానీ నాకు మళ్ళి ఈ పాట చూసి నిర్ధారించుకునే అవకాశం రాలేదు. ఇంకా "నా కళ్ళు చెబుతున్నాయి..నిను ప్రేమించానని..", "ఆగదూ ఆగదూ.. ఆగితే సాగదు", "వందనం అభివందనం", "దేవీ మౌనమా శ్రీదేవీ మౌనమా", "ఒక దేవుడి గుడి లో.." దేనికదే ఫేమస్. అప్పట్లో బాలు గారు కాస్తంత మిమిక్రీ చేసి అచ్చూ అక్కినేని గారే పాడారా అన్నట్లు పాడేవారు. అదీ ఓ కారణమేమో వందనం లాటి పాటలు అంతగా హిట్ అవడానికి. ఏదేమైనా తారలు దిగివచ్చిన సాహిత్యం వీడియో మీకోసం. అలానే ఆసక్తి వుంటే తెలుగు FM వారి లింక్ కూడా ఇస్తున్నాను మిగిలిన పాటలు వినాలని అనిపిస్తే ఆ లింక్ లో వినగలరు. సాహిత్యం మాత్రం కేవలం ఈ పాటకే ఇస్తున్నా.



ఈ చిత్రం లోని మిగిలిన పాటలు ఇక్కడ ఈ లింక్ పై క్లిక్ చేసి వినవచ్చు

చిత్రం : ప్రేమాభిషేకం,
సాహిత్యం : దాసరి నారాయణరావు
సంగీతం : చక్రవర్తి
గానం : బాలసుబ్రహ్మణ్యం

తారలు దిగివచ్చిన వేళ.....
మల్లెలు నడిచొచ్చిన వేళ.....
చందమామతో ఒక మాట చెప్పాలి.. ఒక పాట పాడాలి...
చందమామతో ఒక మాట చెప్పాలి.. ఒక పాట పాడాలి...

||తారలు||

ఊరంతా ఆకాశానా గోరంత దివ్వెగా
పిడికెడంత గుండెలోనా కొండంత వెలుగుగా
కనిపించే రంగులన్ని సింధూరపు చీరెగా
కనిపించని సిగ్గులన్ని ముసుగేసిన మబ్బుగా
కనిపించే రంగులన్ని సింధూరపు చీరెగా
కనిపించని సిగ్గులన్ని ముసుగేసిన మబ్బుగా
నిలిచిపొమ్మనీ మబ్బుగా... కురిసిపొమ్మనీ వానగా...
విరిసిపొమ్మనీ వెన్నెలగా... మిగిలిపొమ్మనీ నా గుండెగా...
మిగిలిపొమ్మనీ... నా గుండెగా...

చందమామతో ఒక మాట చెప్పాలి.. ఒక పాట పాడాలి...
చందమామతో ఒక మాట చెప్పాలి.. ఒక పాట పాడాలి...
||తారలు||

నీలిరంగు చీకటిలో నీలాల తారగా
చూడనంత శూన్యములో దొరకనంత ఆశగా
వేటాడే చూపులన్ని లోలోని ప్రేమగా
వెంటాడే వలపులన్ని కాబోయే పెళ్లిగా
వేటాడే చూపులన్ని లోలోని ప్రేమగా
వెంటాడే వలపులన్ని కాబోయే పెళ్లిగా
చెప్పిపొమ్మనీ మాటగా... చేసిపొమ్మనీ బాసగా...
చూపిపొమ్మనీ బాటగా... ఇచ్చిపొమ్మనీ ముద్దుగా...
ఇచ్చిపొమ్మనీ... ముద్దుగా

చందమామతో ఒక మాట చెప్పాలి.. ఒక పాట పాడాలి...
చందమామతో ఒక మాట చెప్పాలి.. ఒక పాట పాడాలి...
||తారలు||

శుక్రవారం, సెప్టెంబర్ 04, 2009

ఎవరేమీ అనుకున్నా..

రాజశేఖరుని చూసినపుడల్లా నాకు ఆయన మొండి తనం దాని వెంటనే యస్వీ కృష్ణారెడ్డి దర్శకత్వం లో వచ్చిన బడ్జెట్ పధ్మనాభం సినిమాలోని ఈ పాటా గుర్తొచ్చేస్తాయి. అప్పుడప్పుడూ నాకు కాస్త inspiration ఇంధనం అవసరమైనపుడు వినే ఈ పాట పల్లవి లో ధ్వనించే మొండి తనాన్ని రాజశేఖరుడు అణువణువునా ఒంట బట్టించుకున్నారు అనిపిస్తుంది. ఈ మొండితనం తో తను గెలుచుకున్న హృదయాలు ఎన్నున్నాయో బద్ద వైరం పెంచుకున్న హృదయాలు అన్నే ఉన్నాయి. కానీ ఆయన ఇక లేరు అని తెలుసుకుని "అయ్యో" అనుకోని హృదయం ఒక్కటి కూడా లేదనడం లో అతిశయోక్తి లేదేమో.. రాష్ట్రమంతా స్వచ్చందంగా బంద్ పాటిస్తూ శోక సంద్రం లో మునిగిఉందన్న వార్తలు అది నిజమని నిరూపిస్తున్నాయి. తననుకున్నది సాధించడానికి ఎంతకైనా తెగించే తత్వమే "చెప్పకుండా వెళ్తున్నా.." అని చెప్పి మరీ వెళ్ళిపోయేలా చేసిందని బాధ పడడం తప్ప ఎవరైనా ఏమి చేయగలం. ఆ మహా మనిషి కీ ఆయనతో పాటు ఈ దుర్ఘటనలో మరణించిన వారందరి ఆత్మలకూ శాంతి చేకూరాలని మనస్ఫూర్తిగా కోరుకుంటున్నాను.

ఈ పాట వినడం కోసం ఇక్కడ క్లిక్ చేయండి.

ఎవరేమీ అనుకున్నా నువ్వుండే రాజ్యాన
రాజు నువ్వే బంటూ నువ్వే మంత్రీ నువ్వే సైన్యం నువ్వే
ఏమైనా ఏదైనా నువ్వేళ్ళే బడి లోన
పలకా నువ్వే బలపం నువ్వే ప్రశ్నా నువ్వే బదులూ నువ్వే..
అన్నీ నువ్వే కావాలి అనునిత్యం పోరాడాలీ..
అనుకున్నది సాధించాలీ...

||ఎవరేమీ||

అవమానాలే ఆభరణాలు.. అనుమానాలే అనుకూలాలు..
సందేహాలే సందేశాలు.. ఛీత్కారాలే సత్కారాలూ...
అనుకోవాలీ.. అడుగేయాలీ ముళ్ళ మార్గాన్ని అణ్వేషించాలీ..
అలుపొస్తున్నా కలలే కన్నాపూల స్వర్గాన్ని అధిరోహించాలీ..
ఎవరికి వారే లోకంలో.. ఎవరికి పట్టని శోకం లో.. నీతో నువ్వే సాగాలీ..

||ఎవరేమీ||

బలమూ నువ్వే.. బలగం నువ్వే.. ఆటా నీదే.. గెలుపూ నీదే..
నారూ నువ్వే .. నీరూ నువ్వే.. కోతా నీకే.. పైరూ నీకే..
నింగీ లోనా తెల్ల మేఘం నల్ల బడితేనే జల్లులు కురిసేనూ..
చెట్టు పైనా పూలూ మొత్తం రాలీ పోతేనే పిందెలు కాసేనూ..
ఒక ఉదయం ముందర చీకట్లూ.. విజయం ముందర ఇక్కట్లూ..
రావడమన్నది మామూలూ..

||ఎవరేమీ||

ఈ ఫోటోను ప్రచురించిన Hindu వారికీ ఇది నా కళ్ళబడేలా చేసిన త్రివిక్రం గారికీ ధన్యవాదాలు.

గురువారం, ఆగస్టు 27, 2009

పద్మవ్యూహం

ఒకప్పుడు శ్రీశ్రీ గారు చాలా డబ్బింగ్ పాటలు రాశారు అని ఆయన శ్రీమతి గారు రాసిన పుస్తకం లో చదివిన గుర్తే కానీ నాకు ఊహ తెలిసినంత వరకూ డబ్బింగ్ పాటల రచయిత అంటే రాజశ్రీ గారే.. రహ్మాన్ సంగీత దర్శకత్వం మొదలు పెట్టిన మొదటి లో స్వర పరచిన ఈ పద్మవ్యూహం సినిమా పాటలు చాలా బాగుంటాయ్. వాటిలో "కన్నులకు చూపందం" "నిన్న ఈ కలవరింత" మరింత ప్రత్యేకం. పాట చూస్తున్నపుడు లిప్ సింక్ లో తేడాలు, డబ్బింగ్ పాటలలో ఉండే చిన్న చిన్న భాషా దోషాలు ఉన్నాకూడా కమ్మనైన సంగీతం వాటిని సులువుగా క్షమించ గలిగే లా చేస్తుంది. కన్నులకు చూపందం పాట సాహిత్యం కూడా చాలా బాగుంటుంది. ఇక రేవతి "ప్రేమ" సినిమా తో పోలిస్తే ఈ సినిమా సమయానికి కాస్త వయసుమీద పడినట్లు అనిపించినా అందంగా ఆకట్టుకుంటుంది. ఈ సినిమా లో నాకు నచ్చిన పాటలు మీ కోసం.



చిత్రం : పద్మవ్యూహం
సంగీతం : ఏ.ఆర్.రహ్మాన్
సాహిత్యం : రాజశ్రీ
గానం : బాలు

కన్నులకు చూపందం
కవితలకు ఊహందం
చిరు నవ్వు చెలికందం
సిరిమల్లి సిగకందం

||కన్నులకు||

కిరణాలు రవికందం సెలయేరు భువికందం
మగువలకు కురులందం మమతలకు మనసందం
పుత్తడి కి మెరుపందం పున్నమి కి శశి అందం ||2||
నాదాలు శృతికందం రాగాలు కృతికందం

||కన్నులకు||

వేకువకు వెలుగందం రేయంత అతివందం
వేసవికి వెన్నెలందం ఆశలకు వలపందం
తలపులే మదికందం వయసుకే ప్రేమందం ||2||
పాటకే తెలుగందం శ్రీమతికి నేనందం

||కన్నులకు||



చిత్రం : పద్మవ్యూహం
సంగీతం : ఏ.ఆర్.రహ్మాన్
సాహిత్యం : రాజశ్రీ

నిన్న ఈ కలవరింతా లేదులే..
నేడు చిరుగాలి ఏదో అందెలే..
ఇదియే ప్రేమ అందునా..
వయసే పులకరించెనా..
హృదయం కరిగిపోయెనా.. ఓ మనసా!!

||నిన్న ఈ||

దైవముందంటినీ అమ్మనెరిగాకనే
కలలు నిజమంటినీ ఆశ కలిగాకనే
ప్రేమనే ఒప్పుకున్నా నిన్ను చూశాకనే
పూచినా పువ్వులా నవ్వులే ఓ దినం
వన్నెలా మెరుపులా ఆయువే ఓ క్షణం
సృష్టి ఉన్నంతదాకా ప్రేమయే శాశ్వతం..

||నిన్న ఈ||

నింగి లేకున్ననూ భూమి ఉంటుందిలే..
మాట లేకున్ననూ భాష ఉంటుందిలే..
ప్రేమయే లేక పోతే జీవితం లేదులే..
వాసనే లేకనే పూలు పూయొచ్చులే
ఆకులే ఆడకా గాలి కదలచ్చులే
బంధమే లేకపోతే ప్రేమ జన్మించునే

నిన్న ఈ కలవరింతా లేదులే..

నేడు చిరుగాలి ఏదో అందెలే..

ఇదియే ప్రేమ అందునా..
వయసే పులకరించెనా..
హృదయం కరిగిపోయెనా.. ఓ మనసా!!

||నిన్న ఈ||



చిత్రం : పద్మవ్యూహం
సంగీతం : ఏ.ఆర్.రహ్మాన్
సాహిత్యం : రాజశ్రీ
గానం : పి. సుశీల


కన్నులకు చూపందం
కవితలకు ఊహందం
తీగకే పూలందం
వారికే నేనందం

||కన్నులకు||

వానాగిపోయినను ఆకుపై చుక్కందం
అల చెదిరిపోయిననూ దరి నున్న నురుగందం
చిన్నారి తారకలే రాతిరికి ఓ అందం
చిన్నారి తారకలే రాతిరికి ఓ అందం
శ్రీవారి చూపులకు ఎప్పుడు నేనందం

||కన్నులకు||

అందాల వన్నెలకే అపురూప కురులందం
అనురాగ ముద్దరలే చెరిగిన బొట్టందం
మగువ లో ప్రేమొస్తే మనుగడే ఓ అందం
మగువ లో ప్రేమొస్తే మనుగడే ఓ అందం
నా తోడు నీ వుంటే చీకటే ఓ అందం

||కన్నులకు||

శనివారం, ఆగస్టు 15, 2009

జయ జయ జయ ప్రియ భారత

బ్లాగ్ మితృలందరికి స్వాతంత్ర దినోత్సవ శుభాకాంక్షలు. దేశభక్తి గీతాల జాబితా కి అంతులేకున్నా... నన్ను బాగా ఆకట్టుకున్న గీతం దేవులపల్లి వారి "జయ జయ ప్రియభారత ". నేను ఆరవతరగతి లో ఉండగా మా హిందీ మాష్టారు నా గొంతు బావుందని (అప్పట్లో బాగానే ఉండేది లెండి) ఈ పాట, ఇంకా "దేఖ్ తెరే సంసార్ కి హాలత్ క్యా హొగయీ భగవాన్...కిత్‌నా బదల్ గయా ఇన్సాన్..." అనే పాటా నేర్పించారు. ఈ పాట ఎన్ని సార్లు విన్నా నాకు మొదట ఆయనే గుర్తు వస్తారు. ఇదే పాట చిరంజీవి గారి రాక్షసుడు సినిమాలో కూడా ఉపయోగించారు. మామాష్టారు నేర్పిన బాణీ లోనే సినిమా పాట సాగుతుంది. కేవలం సౌందర్యం తోనే కాక ఎన్నుకునే పాత్రలు, వాటిలో లీనమయ్యే తన నటన ద్వారా నన్ను ఆకట్టుకునే కథానాయిక సుహాసిని పై చిత్రీకరించడం నన్ను మరింత అలరించింది.

ఇంకా స్వాతంత్ర దినోత్సవం అంటే వీరుల త్యాగాలు, అలుపెరుగని పోరాటాలు గుర్తిచ్చినా, ఆ తర్వాత గుర్తొచ్చేది బాల్యమే. స్కూల్ లో స్వాతంత్ర దినోత్సవం జరుపుకున్నంత బాగా ఇంకెక్కడా నేనైతే జరుపుకోలేదు (ఈ ఏడు కాస్త వైవిధ్యం ఉంది కానీ దాని గురించి మరో టపాలో). స్కూల్ లో అతి పెద్ద పండగ ఆగస్టు పదిహేను. ఇంట్లో నాన్న ఎర్రకోట పై జండా వందనం విని/చూసి ఆతర్వాత అమ్మా నాన్న వాళ్ళ వాళ్ళ ఆఫీసులకి కేవలం జండా వందనం గురించి వెళ్ళే వాళ్ళు. స్కూల్ లో వారం పదిరోజుల ముందు నుండి ఉన్న హడావిడి ఆ రోజు పతాక స్థాయికి చేరుకునేది.


అద్దెకి తెచ్చిన మైక్ సెట్ లో వేసే "భారత మాతకు జేజేలు..", "పాడవోయి భారతీయుడా..", "నాజన్మభూమి ఎంత అందమైన దేశము..", "చెడు అనవద్దు చెడు కనవద్దు..", గాంధిపుట్టిన దేశమా ఇది.. " లాటి దేశభక్తి గీతాల నేపధ్యం లో క్లాస్ లో అక్కడక్కడా ఊడిపోయిన రంగుకాగితాలని మళ్ళీ అంటిచడం, స్టేజ్ సరిచేయడం, కుర్చీలు గట్రా సర్ధడం ఇత్యాది పనులు చేస్తూ మధ్య మధ్య లో ఈ ఏడు ఏం చాక్లెట్లు తెచ్చారా అని కాస్త పలుకుబడి ఉన్న విధ్యార్ధుల ని ఆరా తీయడం లాటి కార్యక్రమాలతో సందడిగా ఉండేది. ఆ తర్వాత పిల్లలంతా క్రమశిక్షణ తో వరుస క్రమం లో నిలబడటం, పిల్లా పెద్దా జరిపే ప్రార్ధనలు, పెద్దల ఉపన్యాసాలు,పతాకావిష్కరణా, జండావందనం, జణగణమణ గీతం అన్నీ అద్భుతంగా ఉండేవి. ఇప్పుడేమయ్యాయో ఆ ఆనందాలు. పైన చెప్పిన పాటలతో పాటు తర్వాత వచ్చి చేరిన మర్చి పోలేని మరొకొన్ని పాటలు "రేపటి పౌరులం..రేపటి పౌరులం..", "వందే మాతరం.. వందేమాతరం.." ఈ రెండో పాట రాజశేఖర్ నటించిన వందేమాతరం సినిమాలోది అనుకుంటా.. కాస్త యుక్త వయసులో ఉన్నపుడు బోలెడంత ఆవేశాన్ని కలిగించేది.

జయ జయ జయ ప్రియ భారత పాట చిమటమ్యూజిక్ వెబ్సైట్ లో వినడానికి ఇక్కడ క్లిక్ చేయండి.

చిత్రం : రాక్షసుడు
సంగీతం : ఇళయరాజా (లలితగీతపు బాణీ ని యధాతధంగా ఉపయోగించారు)
సాహిత్యం : దేవులపల్లి కృష్ణశాస్త్రి
గానం : జానకి

జయ జయ జయ ప్రియ భారత జనయిత్రీ దివ్యధాత్రి
జయ జయ జయ ప్రియ భారత జనయిత్రీ దివ్యధాత్రి
జయ జయ జయ శత సహస్ర నర నారీ హృదయనేత్రి
జయ జయ జయ శత సహస్ర నర నారీ హృదయనేత్రి
జయ జయ జయ ప్రియ భారత జనయిత్రీ దివ్యధాత్రి

జయ జయ సశ్యామల సుశ్యామచలాచ్చేలాంచల
జయ జయ సశ్యామల సుశ్యామచలాచ్చేలాంచల
జయ వసంత కుసుమలతా చలిత లలిత చూర్ణకుంతల ఆ..ఆ..
జయ మదీయ హృదయాశయ లాక్షారుణ పదయుగళా
జయ జయ జయ ప్రియ భారత జనయిత్రీ దివ్యధాత్రి

జయ దిశాంత గత శకుంత దివ్య గాన పరితోషణ
జయ దిశాంత గత శకుంత దివ్య గాన పరితోషణ
జయ గాయక వైతాళిక గళ విశాల పత విహరణ ఆ..ఆ..
జయ మదీయ మధురగేయ చుంబిత సుందర చరణా

జయ జయ జయ ప్రియ భారత జనయిత్రీ దివ్యధాత్రి
జయ జయ జయ శత సహస్ర నర నారీ హృదయనేత్రి
జయ జయ జయ శత సహస్ర నర నారీ హృదయనేత్రి
జయ జయ జయ ప్రియ భారత జనయిత్రీ దివ్యధాత్రి


చిత్రం "http://www.zabrigraphics.com/graphics/act,categories/cid,46/" నుండి సంగ్రహించబడినది.

ఈ బ్లాగ్ ఎందుకంటే ??

అతిథులకు నమస్కారం. ఓ ఏడాది క్రితం నా ఙ్ఞాపకాలు పదిల పరచుకోవాలని మొదలు పెట్టిన నా బ్లాగ్ లో నా ఙ్ఞాపకాల కంటే పాటల గురించే ఎక్కువ టపాలు ప్రచురించాను. నాకు పాటలంటే అంత ఇష్టం. కానీ నేను ఏవిధమైన సంగీతం నేర్చుకోలేదు కేవలం శ్రోతని మాత్రమే.. అప్పుడప్పుడూ శ్రుతి, రాగం, తాళం లాటి వాటి తో పని లేకుండా పాటలు పాడుకుంటుంటాను. కాలేజి రోజులలో నా సౌండ్ బాగుందని ఒకటి రెండు సార్లు స్టేజ్ పై కూడా పాడనిచ్చారు లేండి అది వేరే విషయం. సరే ఇంత పాటల పిచ్చి ఉన్న నేను పాటల ప్రధానంగా ఒక బ్లాగ్ ప్రారంభిస్తే ఎలా ఉంటుంది అని చాలా రోజులగా ఆలోచించీ..చించీ..చించగా ఇప్పటికి దానికి ఒక కార్య రూపం ఇవ్వగలిగాను. తత్ఫలితమే ఈ బ్లాగు.

నా మరో బ్లాగ్ లో ఇప్పటి వరకూ పోస్ట్ చేసిన పాటలన్నీ ఇక్కడికి కాపీ చేశాను. వాటిని కాస్త సరిచేసి ఇండెక్సింగ్ చేయాలన్న ఆలోచనని ఎప్పటికి ఆచరణ లో పెడాతాను అనే విషయం ఇప్పుడే అడగకండి. ఇక ఈ బ్లాగ్ నుండి ఏమి ఆశించవచ్చు అంటారా? ముఖ్య విభాగాలు చూసిన వారు ఇప్పటికే ఓ అంచనాకి వచ్చి ఉంటారు. ముఖ్యంగా నాకు ఎనభైల లో వచ్చిన తెలుగు పాటలు ఇష్టం, ఇంకా విశ్వనాధ్ గారి పాటలు, వాటితో పాటు బాలమురళీ కృష్ణ గారి శాస్త్రీయ సంగీతమూ విని ఆనందిస్తాను. అలాగే మూడ్ ని పట్టి కొన్ని మాంచి మాస్ మసాలా పాటలూ, అదే చెవితో మైఖేల్ జాక్సన్ లాటి ఆంగ్ల సంగీత కారుల పాటలూ వింటాను (ఇవి చాలా సెలక్టివ్ అనుకోండి).

సో నే వినే పాట లలోనుండి వీలుని పట్టి నాకు నచ్చిన పాటలూ, ఆ పాట వినగానే నా మనసులో కదిలే ఙ్ఞాపకాలు, ఆపాట నాకు అందించే అనుభూతులు అన్నీ మీతో పంచుకుంటాను. ప్రతిపాటకూ సాహిత్యం తప్పని సరిగా ఇవ్వడానికి ప్రయత్నిస్తాను, ఇంకా లభ్యతని పట్టి ఆడియో / వీడియో లింకు లు, పాటకి సంబందించిన ఇతర వివరాలు కూడా ఇవ్వడానికి ప్రయత్నిస్తాను. ఓ విధంగా ఇది నా అన్లైన్ సినిమా పాటల పుస్తకం అని చెప్పచ్చనమాట, సరే మరి అలా అలా నా పాటల ప్రపంచం లో విహారించండి ఇక, ప్రస్తుతానికి శలవు.

శనివారం, ఆగస్టు 01, 2009

సిగలో.. అవి విరులో -- మేఘసందేశం

గత రెండు మూడు వారాలు గా ఈ పాట నన్ను వెంటాడుతుంది, ఎంతగా అంటే ఎక్కడో అడుగున పడిపోయిన నా కలక్షన్ లో వెతికి వెతికి వెలికి తీసి తరచుగా మళ్ళీ వినేంతగా. కారణం ఏమిటో తెలియదు కానీ ఈ ఆల్బం ఎందుకో సంవత్సరానికి ఒక్క సారైనా ఇలా బాగా గుర్తొస్తుంది. అప్పుడు ఒక నెల రెండు నెలలు వినేశాక కాస్త మంచి పాటలు ఏమన్నా వస్తే మళ్ళీ అడుగున పడి పోతుంది. కానీ అక్కడే అలా ఉండి పోదు మళ్ళీ హఠాత్తుగా ఓ రోజు ఙ్ఞాపకమొచ్చి మళ్ళీ తనివి తీరా వినే వరకూ అలా వెంటాడూతూనే ఉంటుంది. మంచి సంగీతం గొప్ప తనం అదేనేమో మరి !! ఈ సినిమా గురించి కానీ సంగీతం గురించి కానీ నేను ప్రత్యేకంగా చెప్పగలిగినది ఏమీ లేదు. నాకు బాగా నచ్చే సినిమాల మొదటి జాబితా లో ఉంటుంది. కధ, సంగీతం, నటీనటుల నటన వేటికవే సాటి. ఈ సినిమా గురించి తెలియని వారుంటే తెలుసు కోడానికి నవతరంగం లో ఈ వ్యాసం చదవండి. ఈ ఆల్బం లో పాటలు అన్నీ ఒక దానిని మించి ఒకటి ఉంటాయి. సరే మరి నన్ను వెంటాడుతున్న ఈ పాట ని మీరూ ఓ సారి ఇక్కడ చిమట మ్యూజిక్ లో విని ఆనందించండి. మొన్నేమో కళ్యాణం, ఇప్పుడేమో సిగలు, విరులు, అగరు పొగలు అసలూ... "సంగతేంటి గురూ !!" అని అడగకండేం :-)


చిత్రం: మేఘసందేశం
గానం: కె. జె. ఏసుదాస్
సాహిత్యం :దేవులపల్లి కృష్ణశాస్త్రి
సంగీతం : రమేష్ నాయుడు.

సిగలొ.. అవి విరులో.. అగరు పొగలో.. అత్తరులో..
మగువ సిగ్గు దొంతరలో.. మసలె వలపు తొలకరులో..
సిగలొ.. అవి విరులో.. అగరు పొగలో.. అత్తరులో..
మగువ సిగ్గు దొంతరలో.. మసలె వలపు తొలకరులో..
సిగలొ.. అవి విరులో..

ఎదుట నా ఎదుటా ఏవో సోయగాల మాలికలు..
ఎదుట నా ఎదుటా ఏవో సోయగాల మాలికలు..
మదిలోనా గదిలోనా... మదిలోనా గదిలోనా...
మత్తిలిన కొత్త కోరికలూ...నిలువనీవు నా తలపులు..
మరీ మరీ ప్రియా..ప్రియా...
నిలువనీవు నా తలపులూ.. నీ కనుల ఆ పిలుపులూ..

సిగలొ.. అవి విరులో.. అగరు పొగలో.. అత్తరులో..
మగువ సిగ్గు దొంతరలో.. మసలె వలపు తొలకరులో..
సిగలొ.. అవి విరులో..

జరిగి ఇటు ఒరిగీ... పరవశాన ఇటులే కరిగి
జరిగి ఇటు ఒరిగీ... పరవశాన ఇటులే కరిగి
చిరునవ్వుల అర విడినా.. చిగురాకు పెదవుల మరిగీ..
చిరునవ్వుల అర విడినా.. చిగురాకు పెదవుల మరిగీ..
మరలి రాలేవు నా చూపులూ.. మరీ మరీ ప్రియా ప్రియా
మరలి రాలేవు నా చూపులూ.. మధువుకై మెదలు తుమ్మెదలూ...

సిగలొ.. అవి విరులో.. అగరు పొగలో.. అత్తరులో..
మగువ సిగ్గు దొంతరలో.. మసలె వలపు తొలకరులో..
సిగలొ.. అవి విరులో..

శనివారం, జులై 25, 2009

సీతాకళ్యాణం - వాగ్దానం(1961) సాహిత్యం

ఘంటసాల మాష్టారి గాత్ర మాధుర్యమో, శ్రీ రామ కథ లోని మహత్తో, పెండ్యాల వారి సంగీత మహిమో లేదా అసలు హరికధా ప్రక్రియ గొప్పతనమే అంతో నాకు సరిగా తెలియదు కానీ, ఈపాట ఎన్ని సార్లు విన్నా ఒళ్ళు పులకరిస్తూనే ఉంటుంది. రేలంగి, నాగేశ్వరరావు, కృష్ణకుమారి లపై చిత్రీకరించిన ఈ పాట లో విశేషమేమిటంటే.. చిత్రీకరణ లో ఎక్కడా శ్రీరామ కళ్యాణాన్ని చూపించరు కానీ కనులు మూసుకుని పాట వింటుంటే మాత్రం కళ్యాణ ఘట్టం అంతా కనుల ముందు సాక్షాత్కరిస్తుంది. ఇది రాసినది శ్రీశ్రీ గారు అని మొదటి సారి తెలిసినపుడు చాలా ఆశ్చర్య పోయాను. ఇక పాట విషయానికి వస్తే రేలంగి గారి బాణి లో చిన్న చిన్న చెణుకు లు విసురుతూ నవ్విస్తూ హుషారు గా సాగే కధ లో మనం మైమరచి పోతాం. "రఘూ రాముడూ... రమణీయ..." అని మొదలు పెట్టగనే తెలియకుండానే తన్మయంగా తల ఊపేస్తాం.. "ఎంత సొగసు కాడే.." అంటే అవును కదా అని అనిపించక మానదు... అసలు సొగసు అన్న మాట పలకడం లోనే ఘంటసాల గారు ఆ దివ్య సుందర మూర్తిని సాక్షాత్కరింప చేస్తారు.
మీరెపుడైనా జలపాతాన్ని దూరం నుండి కాకుండా దాని పై నుండి చూశారా... ప్రవాహం అంతా చాలా ప్రశాంతంగా, నిశ్శబ్దంగా ఏదో చిన్న పిల్ల కాలువ లా ప్రవహిస్తూ కనిపిస్తుంది... కాని ఒక్క సారి అంచుకు వెళ్ళి చూడగానే పైనుండి పోటెత్తుతూ ఉదృతంగా హుషారు గా ముందుకు దూకుతూ మనకి కనువిందు చేస్తుంది. ఇంత వర్ణించడమెందుకు చాలా సినిమా లలో జలపాతాల లో ప్రమాదం సీన్ల లో ఇది మీరు గమనించే ఉంటారు. అలానే అప్పటి వరకు నెమ్మదిగా వ్యాఖ్యానంతో సాగే కథ ఒక్క సారిగా "ఇనకుల తిలకుడు నిలకడ గల క్రొక్కారు మెఱుపు వలె నిల్చీ.." అని అంటూ ఆ జలపాతపు దూకుడునంతా తన స్వరం లో చూపించేస్తారు ఘంటసాల గారు. ఇక చివరికి వచ్చే సరికి హెచ్చు స్వరం లో ఒక్క సారి గా "ఫెళ్ళు మనె విల్లు... " అనగానే సీతమ్మవారి సంగతేమో కానీ కధ వింటున్న వారెవ్వరికైనా గుండె ఝల్లు మనక మానదు అంటే అతిశయోక్తి కాదేమో.

పొయిన ఏప్రిల్ లో శ్రీరామ నవమి రోజు ఈ పాట చాలా గుర్తు చేసుకున్నాను అదే రోజు మధురవాణి గారు తన బ్లాగు లో ఈ పాట లింక్ ఇచ్చారు.. దానికి వెంటనే సాహిత్యం ఇద్దామనుకున్నాను కాని ఇన్ని రోజులకి కుదిరింది. మధురవాణి గారికి ధన్యవాదాలు తెలుపుకుంటూ మళ్ళీ అప్ లోడ్ చేయడానికి బద్దకించి, వారి ఈస్నిప్స్ యకౌంట్ నుండే ఎంబెడ్ చేయబడిన పాట ని, ఈ హరికథా సాహిత్యాన్ని ఇక్కడ మీకోసం ఇస్తున్నాను. విని, చదివి ఆనందించండి తప్పులేమన్నా ఉంటే వ్యాఖ్య ద్వారా తెలియచేయండి.



చిత్రం : వాగ్దానం
సంగీతం : పెండ్యాల
గానం : ఘంటసాల
సాహిత్యం : శ్రీశ్రీ

శ్రీ నగజా తనయం సహృదయం
శ్రీ నగజా తనయం సహృదయం
చింతయామి సదయం త్రిజగన్మహోదయం
శ్రీ నగజా తనయం...ఊ..ఊ...

శ్రీ రామ భక్తులారా ఇదీ సీతాకళ్యాణ సత్కథ
నలభై రోజులనుంచీ చెప్పిన కథ చెప్పిన చోట చెప్పకుండా చెప్పుకొస్తున్నాను
అంచేత కించిత్తు గాత్ర సౌలభ్యానికి అభ్యంతరం ఏర్పడినట్లు తోస్తుంది
నాయనా కాస్త పాలూ మిరియాలూ ఏమైనా...
చిత్తం.. సిద్దం...

భక్తులారా... సీతామహాదేవి స్వయంవరానికి ముల్లోకాలనుంచీ విచ్చేసిన వీరాధి వీరుల్లో..
అందరినీ ఆకర్షించిన ఒకే ఒక్క దివ్య సుందర మూర్తి ఆహ్హ !! అతడెవరయ్యా అంటే...

రఘూరాముడు రమణీయ వినీల ఘన శ్యాముడు..
రమణీయ... వినీల.. ఘన శ్యాముడు..
వాడు నెలరేడు సరిజోడు మొనగాడు..
వాని కనులు మగమీలనేలు రా..
వాని నగవు రతనాల జాలు రా..
వాని కనులు మగమీలనేలు రా..
వాని నగవు రతనాల జాలు రా..
వాని జూచి మగవారలైన మైమరచి మరుల్కొనెడు మరో మరుడు మనోహరుడు..రఘూరాముడు

సనిదనిసగ రిగరి రిగరి సగరి రిగరి సగగరి సనిదని
సగగరి సని రిసనిస రిసనిస నిదపమగరి రఘురాముడు...
ఔనౌను...
సనిస సనిస సగరిరిగరి సరిసనిస..పదనిస..
సనిగనినిస సనిరిసనిదని నిదసనిదపమ గ మ స
నినినినిని..పస పస పస పస...
సఫ సఫ సఫ తద్దీం తరికిటతక...
రఘూరాముడూ రమణీయ వినీల ఘన శ్యాముడు..
శభాష్..శభాష్...

ఆప్రకారంబుగా విజయం చేస్తున్న శ్రీరామచంద్రమూర్తిని అంతఃపుర గవాక్షం నుండీ సీతాదేవి ఓరకంట చూచినదై
చెంగట నున్న చెలికత్తె తో.. ఎంత సొగసుగాడే..ఎంత సొగసుగాడే మనసింత లోనే దోచినాడే... ఎంత సొగసుగాడే...
మోము కలువ రేడే ఏ..ఏ.. ఏ... మోము కలువ రేడే నా నోము ఫలము వీడే...
శ్యామలాభిరాముని చూడగ నామది వివశమాయె నేడే... ఎంత సొగసుగాడే..
ఇక్కడ సీతాదేవి ఇలా పరవశయై ఉండగా..
అక్కడ స్వయం వర సభా మంటపంలో జనక మహీపతి సభాసదులను చూచి
అనియెనిట్లు ఓ యనఘులార నా యనుగు పుత్రి సీతా...
వినయాదిక సద్గుణ వ్రాత.. ముఖ విజిత లలిత జలజాత...
ముక్కంటి వింటి నెక్కిడ జాలిన ఎక్కటి జోదును నేడు
మక్కువ మీరగ వరించి మల్లెల మాల వైచి పెండ్లాడు...ఊ..ఊ...

అని ఈ ప్రకారం జనక మహారాజు ప్రకటించగానే సభలోని వారందరూ ఎక్కడివారక్కడ చల్ల బడి పోయారట...
మహా వీరుడైన రావణాసురుడు కూడా..హా ఇది నా ఆరాధ్య దైవమగు పరమేశ్వరుని చాపము
దీనిని స్పృశించుట యే మహా పాపము అని అనుకొనిన వాడై వెనుదిరిగి పోయాడట తదనంతరంబున...

ఇనకుల తిలకుడు నిలకడ గల క్రొక్కారు మెఱుపు వలె నిల్చీ..
తన గురువగు విశ్వామితృని ఆశీర్వాదము తలదాల్చి...
సదమల మద గజ గమనము తోడ స్వయంవర వేదిక చెంత..
మదన విరోధి శరాసనమును తన కరమున బూనిన యంత...

ఫెళ్ళు మనె విల్లు గంటలు ఘల్లు మనే...
ఘుభిల్లుమనె గుండె నృపులకు..
ఝల్లు మనియె జానకీ దేహమూ...
ఒక నిమేషమ్మునందె.. నయము జయము ను
భయము విస్మయము గదురా... ఆఆ ఆఆ
శ్రీమద్రమారమణ గోవిందో హారి... హారి
భక్తులందరు చాలా నిద్రావస్త లో ఉన్నట్టుగా ఉంది మరొక్కసారి..
జై శ్రీమద్రమారమణ గోవిందో హారి... హారి
భక్తులారా ఆ విధంగా శ్రీరామచంద్రమూర్తి శివ ధనుర్బంగము కావించినాడు...
అంతట..
భూతల నాధుడు రాముడు ప్రీతుండై పెండ్లియాడే..
పృథుగుణ మణి సంఘాతన్ భాగ్యో పేతన్ సీతన్..
భూతల నాధుడు రాముడు ప్రీతుండై పెండ్లియాడే..
శ్రీమద్రమారమణ గోవిందో హారి... హారి

మంగళవారం, జూన్ 30, 2009

అలక పానుపు ఎక్కనేల-శ్రీవారి శోభనం

ఈ సినిమా నాకు పూర్తిగా చూసినట్లు గుర్తు లేదు ఎపుడో ఒక సారి టీవీ లో ఈ పాట వేస్తుంటేనో లేక సినిమా వేస్తుంటే పాట మాత్రమే చూసానో కూడా సరిగా గుర్తు లేదు కాని అప్పట్లో రేడియో లో క్రమం తప్పకుండా నేను వినే కొన్ని పాటలలో ఇదీ ఒకటి. మొదట్లో అంటే మరీ చిన్న తనం లో బామ్మ గారి కామెంట్స్ విని నవ్వుకోడానికి వినే వాడ్ని, కాస్త పెద్దయ్యాక భామ గారి పాట్లు అవగతమై పాట పూర్తి గా అర్ధమయింది :-) ఇక జానకమ్మ గారి గాత్రం గురించి నేనేం చెప్పినా తక్కువే... ఆ దోర నవ్వు దాచకే అని అంటూ ఆవిడ నవ్వే నవ్వు మనకే తెలియకుండా మన పెదవులపై చిరుమందహాసాన్ని నాట్యం చేయిస్తుంది. అంతెందుకు ఆవిడ శీతాకాలం అంటూ గొంతు వణికించడం వింటే ఎంత మండు వేసవి లో ఉన్నా మనకీ చలి వేసి వణుకు పుట్టేస్తుందంటే అతిశయోక్తి కాదేమో... పాటంతా వేటూరి గారు ఎంత అందం గా రాశారో బామ్మ గారి చివరి మూడుపంక్తులు "నులకపానుపు నల్లి బాధ.." అంటూ అంతే కొంటె గా రాశారు. సరే మరి మీరూ ఓ సారి మళ్ళీ విని తరించేయండి.



చిత్రం : శ్రీవారి శోభనం (1985)
సాహిత్యం :వేటూరి
సంగీతం : రమేష్ నాయుడు
గానం : జానకి, ఆనితా రెడ్డి

అలక పానుపు ఎక్కనేల చిలిపి గోరింకా...ఆ..అలక చాలింకా...
బామ్మ: నాకలకేమిటే నీ మొహం ఊరుకో...
అలక పానుపు ఎక్కనేల చిలిపి గోరింకా...ఆ..అలక చాలింకా...
శీతాకాలం సాయంకాలం...మ్...
శీతాకాలం సాయంకాలం...మ్...
అటు అలిగిపోయే వేళా చలికొరికి చంపే వేళా...ఆఆ....
బామ్మ: అందుకే లోపలికి పోతానే తల్లి నన్నొదులు....

||అలకపానుపు||

రామ రామ శబరి బామ్మ నిద్దరేపోదూ..!!
బామ్మ: హూ నువ్విట్టా ఇంతగొంతేసుకుని పాడితే నిద్దరెట్టాపడుతుందే...
రాతిరంతా చందమామ నిదరపోనీదు...ఊ..ఊ...
కంటి కబురా పంప లేనూ...ఊ...
ఇంటి గడపా దాటలేనూ..ఊ..
ఆ దోర నవ్వు దాచకే.. నా నేరమింకా ఎంచకే...
ఆ దోర నవ్వు దాచకే.. ఈ నవ్వు నవ్వి చంపకే...

||అలకపానుపు||

రాసి ఉన్న నొసటి గీత చెరపనేలేరు...
రాయనీ ఆ నుదుటి రాతా రాయనూ లేరూ...
బామ్మ: ఆ రాతే రాసుంటే ఇంట్లో నే వెచ్చగా నిద్రబోయేదాన్ని కదా !!
రాసి ఉన్న నొసటి గీత చెరపనేలేరు...
రాయనీ ఆ నుదుటి రాతా రాయనూ లేరూ...
నచ్చినా మహరాజు నీవూ...
నచ్చితే మహరాణి నేనూ...
ఆ మాట ఏదో తెలిపితే నీ నోటి ముత్యం రాలునా...

బామ్మ:
నులకపానుపు నల్లి బాధ పిల్ల చిలకమ్మా... అల్లరాపమ్మా...
శీతాకాలం సాయంకాలం శీతాకాలం సాయంకాలం...ఊ..||2||
నను చంపకే తల్లీ... జో కొట్టకే గిల్లీ...

||అలకపానుపు||

ఆదివారం, జూన్ 21, 2009

మాటల్తో స్వరాలే షికారు కెళ్తె...

సంగీతాభిమానులందరికీ ప్రపంచ సంగీత దినోత్సవ (June 21st) శుభాకాంక్షలు...

ఈ రోజు ప్రపంచ సంగీత దినోత్సవం అని ఉదయాన్నే తన విషెస్ తో తెలియచేసిన నేస్తానికీ, ఇంకా ఈ పాట తో విషెస్ చెప్పిన మరో నేస్తానికి థ్యాంక్స్ తెలుపుకుంటూ మీ కోసం ఈ పాట.

ఇక్కడ వినండి

చిత్రం : అమ్మచెప్పింది
సంగీతం : కీరవాణి
సాహిత్యం : సుద్దాల అశోక్ తేజ
గానం : ప్రణవి

మాటల్తో స్వరాలే షికారు కెళ్తె గీతం
అందంగా నిశ్శబ్దం తలొంచుకుంటే సంగీతం
సంగీతం తో చేస్తే స్నేహం
పలికిందల్లా గీతం...

||మాటల్తో||

కాగితాలలో నిదురపోయే కమ్మనీ మాటే..
కాస్త లెమ్మనీ ఇళయరాజా ట్యూన్ కడుతుంటే..
పాటల్లె ఎగిరి రాదా.. నీ గుండె గూడైపోదా..
సంగీతం తో చేస్తే స్నేహం
హృదయం లయలే గీతం...

||మాటల్తో||

గోరుముద్దలో కలిపి పెట్టే గారమొక పాట
పాఠశాలలో మొదట నేర్పే పాఠమొక పాటా
ఊయలని ఊపును పాటే
దేవుడిని నేర్పును పాటే..
సంగీతం తో చేస్తే స్నేహం
బ్రతుకంతా ఓ గీతం...

||మాటల్తో||

శుక్రవారం, జూన్ 19, 2009

పల్లెటూరి పిల్లగాడా...పశులగాసే మొనగాడ..

ఒకో సారి హఠాత్తుగా, కారణం తెలియకుండా ఎప్పుడో విన్న పాట, చాలా రోజులుగా అసలు వినని పాట ఒకసారిగా గుర్తొచ్చి అలా ఒకటి రెండు రోజులు వెంటాడుతూ ఉంటుంది. మన మూడ్ కాని ఉన్న పరిసరాలు కానీ పట్టించుకోకుండా పదే పదే అదే హమ్ చేసేస్తాం. నన్ను గత రెండు రోజులుగా అలా వెంటాడుతున్న పాట "మాభూమి" చిత్రం లోని "పల్లెటూరీ పిల్లగాడ.." పాట. నిజానికి ఈ సినిమా గురించి గానీ పాట గురించి గానీ ప్రత్యేకంగా పరిచయం చేయాల్సిన అవసరం లేదు. బాల కార్మిక వ్యవస్తనంతటినీ కాకున్నా పల్లెల్లో సాధారణంగా కనిపించే పిల్లల గురించి వాళ్ళ శ్రమని కూడా ఎలా దోచుకుంటారో తెలియచేస్తూ హృద్యంగా రాసిన సాహిత్యం ఒక ఎత్తైతే. ఈ పాట పాడిన సంధ్య గారి గాత్రం మరో ఎత్తు. పదునుగా ప్రశ్నిస్తున్నట్లు ఉంటూనే "ఓ..పాల బుగ్గలా జీతగాడ.." అనే చోట... ఓ అని అనడం లో తన స్వరం లో విషాదం తో గుండెలు పిండేస్తారు ఆవిడ.

ఈ చిత్రం గురించి పరిచయం కోసం ఇక్కడ తెలుగుసినిమా లో ఇంకా ఈ చిత్ర రూపకర్తల్లో ఒకరైన నర్సింగరావు గారి గురించి ఇక్కడ మన నవతరంగం లో చూడగలరు. ఈ సినిమాను నేను మొదటి సారి 90 లలో ఎపుడో దూరదర్శన్ లో వేసినపుడు చూసాను అంతకు ముందు పాట విన్నాను కానీ అపుడే మొదటి సారి చూడటం, చూసినపుడు ఏదో నలభైల లో వచ్చిన సినిమా కావచ్చు అని అనుకున్నాను కానీ అన్నగారు చిలకొట్టుడు కొడుతూ ఊపేస్తున్న సమయం లో అంటే 1980 లో విడుదలై ఇంత హిట్ అయింది అని తెలుసుకుని చాలా ఆశ్చర్యపోయాను.

అన్నట్లు, బాల కార్మికులంటే నన్నెప్పటి నుండో తొలుస్తున్న ఓ ప్రశ్న గుర్తొచ్చింది ఇది కేవలం ఇళ్ళలోనో హోటళ్ళలోనో కూలి పని చేసే వారికే వర్తిస్తుందా ? వాణిజ్య ప్రకటనల లోనూ, చలన చిత్రాల లోనూ పని చేసే పసి పిల్లలకు వర్తించదా ఈ బాలకార్మిక చట్టం!! ఆ మాట కొస్తే బండెడు పుస్తకాలను మోసుకు వెళ్ళే మా సంగతేంటి అంటారేమో కాన్వెంట్ పిల్లలు.

ఈ పాట వీడియో ఇక్కడ చూడచ్చు...




వీడియో లో కొన్ని చరణాలు లేవు పూర్తి పాట ఆడియో ఇక్కడ వినండి

Palletoori Pillaga...


చిత్రం : మాభూమి (1980)
సంగీతం : వింజమూరి సీత, గౌతం ఘోష్
సాహిత్యం : సుద్దాల హనుమంతు
గానం : సంధ్య

పల్లెటూరీ పిల్లగాడా!! పశులగాసే మొనగాడ !!
పల్లెటూరీ పిల్లగాడా !! పశులగాసే మొనగాడ !!

పాలు మరచీ ఎన్నాల్లయ్యిందో .. ఓ..పాలబుగ్గలా జీతగాడా..
కొలువు కుదిరీ ఎన్నాల్లయ్యిందో..

చాలి చాలని చింపులంగీ చల్లగాలికి సగము ఖాళీ..
చాలి చాలని చింపులంగీ చల్లగాలికి సగము ఖాళీ..
గోనె చింపూ కొప్పెర పెట్టావా...
ఓ.. పాలబుగ్గలా జీతగాడా..
దాని చిల్లులెన్నో లెక్కాబెట్టేవా..

తాటి గెగ్గలా కాలి జోడూ తప్పటడుగుల నడక తీరు
తాటి గెగ్గలా కాలి జోడూ తప్పటడుగుల నడక తీరు
బాట తో పని లేకుంటయ్యిందా...

ఓ.. పాలబుగ్గలా జీతగాడా..
చేతికర్రే తోడైపోయిందా..

గుంపు తరలే వంపు లోకి కూరుచున్నవు గుండు మీద..
గుంపు తరలే వంపు లోకి కూరుచున్నవు గుండు మీద..
దొడ్డికే నీవు దొరవై పోయావా...
ఓ.. పాలబుగ్గలా జీతగాడా..
దొంగ గొడ్లనడ్డగించేవా...

కాలువై కన్నీరు గారా... కల్ల పై రెండు చేతులాడ..
కాలువై కన్నీరు గారా... కల్ల పై రెండు చేతులాడ..
వెక్కి వెక్కి ఏడ్చెదవదియేలా
ఓ.. పాలబుగ్గలా జీతగాడా..
ఎవ్వరేమన్నారో చెప్పేవా..


మాయదారి ఆవుదూడలు మాటి మాటికి ఎనుగుదుమికి
మాయదారి ఆవుదూడలు మాటి మాటికి ఎనుగుదుమికి
పంట చేను పాడు చేసాయా
ఓ.. పాలబుగ్గలా జీతగాడా..
పాలికాపూ నిన్నే గొట్టాడా..

నీకు జీతము నెలకు కుంచము.. తాలు వడిపిలి కల్తి గాసము
నీకు జీతము నెలకు కుంచము.. తాలు వడిపిలి కల్తి గాసము
కొలువగ శేరు తక్కువ వచ్చాయా...
ఓ.. పాలబుగ్గలా జీతగాడా..
తల్చుకుంటే దుఖం వచ్చిందా..

పల్లెటూరీ పిల్లగాడా !! పశులగాసే మొనగాడ !!
పల్లెటూరీ పిల్లగాడా !! పశులగాసే మొనగాడ !!
పాలు మరచీ ఎన్నాల్లయ్యిందో ..
ఓ..పాలబుగ్గలా జీతగాడా..

కొలువు కుదిరీ ఎన్నాల్లయ్యిందో..
కొలువు కుదిరీ ఎన్నాల్లయ్యిందో..
కొలువు కుదిరీ ఎన్నాల్లయ్యిందో..

శుక్రవారం, ఏప్రిల్ 03, 2009

రామా కనవేమి రా !!

శ్రీ రామ నవమి సంధర్బంగా తోటి బ్లాగరు లందరికీ, పాఠకులకూ, నా హృదయపూర్వక శ్రీరామ నవమి శుభాకాంక్షలు. అంతా ఈ పాటికి పూజలు గట్రా ముగించుకుని రేడియో లో కళ్యాణం వింటూ ఉండి ఉంటారు. రేడియో లో వింటం ఏమిటి నా మొహం నేనింకా ఎనభైల లోనే ఉన్నాను !! ఇప్పుడన్నీ లైవ్ ప్రోగ్రాం లే కదా... సరే లెండి టీవీ లో చూస్తుండి ఉంటారు. నా మటుకు నాకు శ్రీరామ నవమి అనగానే మొదట గుర్తొచ్చేది భద్రాచలం లోని రాముని కళ్యాణం, ఆ వైభవానికి తగ్గట్టుగా ఇక ఉషశ్రీ గారి వ్యాఖ్యానం (ఇక్కడ క్లిక్ చేసి వినవచ్చు), ముఖ్యమంత్రి నెత్తిన పెట్టుకుని మరీ తీసుకు వచ్చే ముత్యాల తలంబ్రాలు, దేనికవే సాటి. వాటి తర్వాత వీధి వీధి నా వెలసే నవమి పందిళ్ళు. ఆ పందిళ్ళ లో దొరికే బెల్లం పానకమూ, వడపప్పూ. ఇక ఒకో బజారు లో పోగైన చందాల ను పట్టీ అక్కడ ఉండే కలిగిన వాళ్ళని బట్టీ వాళ్ళ వాళ్ళ శక్తి కి తగ్గట్టు గా ఒకప్పుడు నాటకాలు, కోలాటాలు, డ్యాన్సు లు ఏర్పాటు చేస్తే ఆ తర్వాత అంటే నేను కాస్త పెద్దయ్యాక 16mm ప్రొజక్టర్ లతో సినిమాలు, ఆ తర్వాత మరికొన్నాళ్ళకి వీధి కొకటి గా వెలసిన దివాకరం వీడియో షాపు నుండి వీడియో క్యాసెట్ లు టీవీ సెట్ లు అద్దెకు తెచ్చి వాటిలో పాత సినిమాలు వేసే వాళ్ళు. ప్రస్తుతం డీవీడీ లతో పైరసీ సినిమాలు వేసే స్థాయి కి ఎదిగి పోయుంటార్లెండి.

సరే ఇంకా రామనవమి అనగానే నాకు సీతారాముల కల్యాణం చూతము రారండీ పాట గుర్తొస్తుంది. ఆ పాటా, ఇంకా పందిళ్ళ లో క్రమం తప్పకుండా వేసే లవకుశ లో పాటలు భాస్కర్ గారు తన టపా లో అల్రెడీ వేసేసారు (ఆ టపా ఇక్కడ చూడండి) ఇవేకాక ఇంకా సీతారామ కల్యాణం అనగానే ఖచ్చితంగా ఓ రెండు హరికధలు గుర్తుకు వస్తాయి. ఈ రెండూ సోషల్ సినిమాలకు సంభందించినవైనా అందులో సీతా రాములను చూపించక పోయినా ఆ వర్ణన, సంగీతం, గాత్రం మనల్ని మంత్ర ముగ్దులను చేస్తాయి. వాటిలో మొదట గుర్తు వచ్చేది వాగ్దానం సినిమా లో ఘంటసాల గారు గానం చేసిన సీతా కళ్యాణం హరికధ. రేలంగి గారి బాణి లో చిన్న చిన్న చెణుకు లు విసురుతూ నవ్విస్తూ హుషారు గా సాగే కధ లో మనం మైమరచి పోతాం. "రఘూ రాముడూ... రమణీయ..." అని మొదలు పెట్టగనే తెలియకుండానే తన్మయంగా తల ఊపేస్తాం.. "ఎంత సొగసు కాడే.." అంటే అవును కదా అని అనిపించక మానదు... అసలు సొగసు అన్న మాట పలకడం లోనే ఘంటసాల గారు ఆ దివ్య సుందర మూర్తిని సాక్షాత్కరింప చేస్తారు. ఇక చివరికి వచ్చే సరికి హెచ్చు స్వరం లో ఒక్క సారి గా "ఫెళ్ళు మనె విల్లు... " అనగానే సీతమ్మవారి సంగతేమో కానీ కధ వింటున్న వారెవ్వరికైనా గుండె ఝల్లు మనక మానదు అంటే నమ్మండి. ఈ పాట నాకు పూర్తిగా ఎక్కడా దొరక లేదు. దొరికిన వెంటనే పోస్ట్ చేస్తాను.

ఇక రెండోది స్వాతి ముత్యం సినిమా లోనిది. విశ్వనాధ్ గారి దర్శకత్వం, కమల్ అభినయం, హరికధ, భజన, కోలాటం అన్ని కలిపి ఇళయరాజా గారు స్వరకల్పన చేసిన ఈ పాటను బాలు గారు అలరిస్తారు. నాకు ఈ పాట చాలా ఇష్టమ్ ఎక్కువ సార్లు వినడం వలనో ఏమో దదాపు నోటికి కంఠతా వచ్చు :) కాలేజ్ లో కూడా ఒకరిద్దరు ఫ్రెండ్స్ అడిగి మరీ ఈ పాట పాడించుకునే వారు నా చేత... ఈ పాట శ్రీరామ నవమి సంధర్బంగా మీ కోసం.



చిత్రం: స్వాతిముత్యం (1986)
గానం : బాలసుబ్రహ్మణ్యం, జానకి
సాహిత్యం : ఆత్రేయ
సంగీతం : ఇళయరాజ

రామా కనవేమి రా
రామా కనవేమిరా శ్రీ రఘు రామ కనవేమిరా
రామా కనవేమి రా
రమణీ లలామ నవ లావణ్య సీమ
ధరాపుత్రి.. సుమ గాత్రి..
ధరాపుత్రి సుమ గాత్రి నడయాడి రాగా
రామా కనవేమి రా !!

సీతా స్వయంవరం ప్రకటించిన పిమ్మట జనకుని కొలువులో ప్రవేసించే జానకిని
సభాసదులందరు పదే పదే చూడగా శ్రీ రామ చంద్ర మూర్తి
కన్నెత్తి సూడడేమని అనుకుంటున్నారట తమలో సీతమ్మ అనుంగు చెలికత్తెలు

||రామా కనవేమి రా||

ముసి ముసి నగవుల రసిక శిఖామణులు సా నిదమ ప మగరిస
ఒసపరి చూపుల అసదృశ విక్రములు సగరిగ మనిద మ ని ని
ముసిముసి నగవుల రసిక శిఖామణులు తా తకిట తక ఝణుత
ఒసపరి చూపుల అసదృశ విక్రములు తకఝణు తకధిమి తక
మీసం మీటే రోష పరాయణులు నీ దమప మా గరిగ
మా సరి ఎవరను మత్త గుణొల్వణులూ.. ఆహ..
క్షణమే.. ఒక దినమై.. నిరీక్షణమే.. ఒక యుగమై...
తరుణి వంక శివ ధనువు వంక
తమ తనువు మరచి కనులు తెరచి చూడగ
రామా కనవేమిరా..కనవేమిరా..

ముందుకేగి విల్లందబోయి ముచ్చెమటలు కక్కిన దొరలు భూ వరులు
తొడగొట్టి ధనువు చేపట్టి బావురని గుండెలు జారిన విభులు

ముందుకేగి విల్లందబోయి ముచ్చెమటలు కక్కిన దొరలు భూ వరులు
తొడగొట్టి ధనువు చేపట్టి బావురని గుండెలు జారిన విభులు
అహ గుండెలు జారిన విభులు
విల్లెత్తాలేక మొగమెత్తాలేక సిగ్గేసిన నరపుంగవులూ
తమ వళ్ళు వొరిగి రెండు కళ్ళు తిరిగి వొగ్గేసిన పురుషాగ్రణులూ
ఎత్తే వారు లేరా అ విల్లు ఎక్కు పెట్టే వారు లేరా
ఆ ఎత్తే వారు లేరా అ విల్లు ఎక్కు పెట్టే వారు లేరా
అరెరె ఎత్తే వారు లేరా అ విల్లు ఎక్కు పెట్టే వారు లేరా
అహ ఎత్తే వారు లేరా అ విల్లు ఎక్కు పెట్టే వారు లేరా
కడక తైయ్యకు తా ధిమి తా..

రామాయ రామభద్రాయ రామచంద్రాయ నమః
అంతలొ రామయ్య లేచినాడు ఆ వింటి మీద చెయ్యి వేసినాడు
అంతలొ రామయ్య లేచినాడు ఆ వింటి మీద చెయ్యి వేసినాడు
సీత వంక ఓరకంట చూసినాడు
సీత వంక ఓరకంట చూసినాడు
ఒక్క చిటికలో విల్లు ఎక్కు పెట్టినాడు
చిటికలో విల్లు ఎక్కు పెట్టినాడు
ఫెళ ఫెళ ఫెళ ఫెళ ఫెళ ఫెళ విరిగెను శివ ధనువు
కళలొలికెను సీతా నవ వధువు
జయ జయ రామ రఘుకుల సొమ ||2||
దశరథ రామ దైత్యవి రామ ||2||
జయ జయ రామ రఘుకుల సొమ ||2||
దశరథ రామ దైత్యవి రామ ||2||

సీతా కల్యాణ వైభోగమే శ్రీ రామ కల్యాణ వైభోగమే ||2||
కనగ కనగ కమనీయమె అనగ అనగ రమణీయమె ||2||
సీతా కల్యాణ వైభోగమే శ్రీ రామ కల్యాణ వైభోగమే
రామయ్య అదుగోనయ్య
రమణీ లలామ నవ లావణ్య సీమ
ధరాపుత్రి సుమ గాత్రి నడయాడి రాగా
రామా కనవేమిరా శ్రీ రఘు రామ కన వేమిరా ఆ.. ఆ.. ఆ..
రామా కనవేమి రా

గురువారం, ఫిబ్రవరి 19, 2009

బొమ్మను చేసీ.. ప్రాణము పోసీ.. ఆడేవు నీకిది వేడుకా !!

ఈ పాట గురించి ఏమని చెప్పను. ఘంటసాల గారి గాత్రం తో మనసు ను మెలి పెట్టే పాట. ఆత్మీయులను కోల్పోయినపుడు గుర్తొచ్చి మరింత భాధ పెట్టే పాట. ఆపద్బాన్ధవుడు లో అడిగినట్లు "ఆ దేవుడి కి తను చేసుకున్న బొమ్మ ల పై తనకు హక్కు లేదా" అని అడుగుతున్నారా ?, మరి అలా తన ఇష్టమొచ్చినట్లు ఆడు కుందామని అనుకున్నపుడు ఆ బొమ్మల మధ్య అనుభంధాలు, మమతానురాగాలు ఎందుకు సృష్టించాలి ? ఏంటో ఈ దేవుడు !! అందుకే ఒకటి మాత్రం నిజం... తలచేది జరుగదూ... జరిగేది తెలియదూ... !!



చిత్రం: దేవత (1965)
సంగీతం : యస్.పి. కోదండపాణి
సాహిత్యం : శ్రీశ్రీ
గానం : ఘంటసాల

బ్రతుకంత బాధ గా... కలలోని గాధ గా...
కన్నీటి ధారగా.... కరగి పోయే...
తలచేది జరుగదూ... జరిగేది తెలియదూ... !!

బొమ్మను చేసీ.. ప్రాణము పోసీ.. ఆడేవు నీకిది వేడుకా.. ||2||
గారడి చేసీ.. గుండెలు కోసీ.. నవ్వేవు ఈ వింత చాలికా...

|| బొమ్మను ||

అందాలు సృష్టించినావు.. దయతో నీవూ..
మరల నీ చేతితో నీవె తుడిచేవులే..
అందాలు సృష్టించినావు.. దయతో నీవూ..
మరల నీ చేతితో నీవె తుడిచేవులే..
దీపాలు నీవే వెలిగించినావే.. ఘాఢాంధకారాన విడిచేవులే..
కొండంత ఆశా.. ఆడియాశ చేసీ...
కొండంత ఆశా.. ఆడియాశ చేసీ.. పాతాళ లోకాన తోసేవులే..

|| బొమ్మను ||

ఒక నాటి ఉద్యానవనమూ.. నేడు కనమూ..
అదియే మరుభూమి గా నీవు మార్చేవులే..
ఒక నాటి ఉద్యానవనమూ.. నేడు కనమూ..
అదియే మరుభూమి గా నీవు మార్చేవులే..
అనురాగ మధువు అందించి నీవు.. హలా హల జ్వాల చేసేవులే
ఆనందనౌకా పయనించు వేళా..
ఆనందనౌకా పయనించు వేళా.. శోకాల సంద్రాన ముంచేవులే !!

|| బొమ్మను ||

నేను ??

నా ఫోటో
గుంటూరు, ఆంధ్రప్రదేశ్, India
అర్ధంకానివాళ్ళకో ప్రశ్నార్థకం, అర్ధమైన వాళ్ళకో అనుబంధం. ఈ లోకంలో ఎందరో పిచ్చాళ్ళున్నారు. డబ్బు, పదవి, కీర్తి, కాంత, కనకం, ప్రేమ, సినిమా, మంచితనం, తిండి ఇలా ఎవరికి తోచిన పిచ్చిలో వాళ్ళు మునిగి తేలుతుంటారు. నేనూ ఓ పిచ్చోడ్నే.
TwitterFacebookGoogle PlusLinkedInRSS FeedEmail