ఆదివారం, మే 12, 2013

కథగా కల్పనగా కనిపించెను

ఈ సినిమా నేను అంతగా ఊహతెలియని వయసులో మొదటి సారి చూశాను అప్పట్లో శీనూ విజ్జీకి కథ చెప్పే సన్నివేశంలో వచ్చే భోజరాజు పాట ఒక్కటే నచ్చేది. కొంతకాలం తర్వాత విన్నపుడు ఈ కథగా కల్పనగా పాట మనసుకు హత్తుకుపోయింది. పాట ప్రారంభంలో వచ్చే మ్యూజిక్ బిట్ చాలా బాగుంటుంది. ఇళయరాజా గారి సంగీతం అలా స్మూత్ గా సాగుతూ మనసుకు జోలపాడేస్తుంది. బాలూ మహేంద్ర క్లాసిక్ ఈ సినిమా. ఈ పాట సినిమా థీంని చెప్పేస్తుంది. సినిమా చివర్లో వచ్చే విషాదచరణంలో చెప్పినట్లు కొందరు కొందరి జీవితాల్లోకి ఎందుకు వస్తారో ఎందుకు కాదని పోతారో స్పష్టమైన కారణాలు చెప్పలేము. 

ఈ మధురమైన పాట ఆడియో మాత్రమే వినాలంటే ఇక్కడ వినండి. ఇక్కడ ఇచ్చిన వీడియోకన్నా మరింత స్పష్టమైన పాట వీడియో ఇక్కడ క్లిక్ చేసి చూడవచ్చు.



చిత్రం: వసంత కోకిల (1982)
సంగీతం: ఇళయరాజా
గీతరచయిత: మైలవరపు గోపి
నేపధ్య గానం: బాలు

కథగా కల్పనగా కనిపించెను నాకొక దొరసాని||2||
నా మదిలోని పాటగా..ఆమని విరిసే తోటగా
లాలి లాలో జోలాలిలో... లాలి లాలో జోలాలిలో

మోసం తెలియని లోకం మనదీ
తీయగ సాగే రాగం మనదీ
ఎందుకు కలిపాడో..బొమ్మలను నడిపే వాడెవడో
నీకూ నాకూ సరిజోడని..కలలోనైనా విడరాదనీ

కథగా కల్పనగా కనిపించెను నాకొక దొరసాని
నా మదిలోని పాటగా..ఆమని విరిసే తోటగా
లాలి లాలో జోలాలిలో... లాలి లాలో జోలాలిలో

కారడవులలో కనిపించావూ
నా మనసేమో కదిలించావూ
గుడిలో పూజారై నా హృదయం నీకై పరిచాను
ఈ అనుబంధం ఏ జన్మదీ..ఉంటే చాలు నీ సన్నిధి

కథగా కల్పనగా కనిపించెను నాకొక దొరసాని
నా మదిలోని పాటగా..ఆమని విరిసే తోటగా
లాలి లాలో జోలాలిలో... లాలి లాలో జోలాలిలో

సినిమా చివరిలో వచ్చే మూడవ చరణం.. ఇక్కడ చూడండి..
 

ఎవరికి ఎవరో ఎదురవుతారూ..
మనసూ మనసూ ముడిపెడతారూ..
ఎందుకు వస్తారో కాదనీ ఎందుకు పోతారో..
బ్రతుకే రైలుగా సాగేనటా.. నీతో నువ్వే మిగిలేవటా..

కథగా కల్పనగా కనిపించెను నాకొక దొరసాని
నా మదిలోని పాటగా.. ఆమని విరిసే తోటగా
లాలిజో జోలాలిజో ... లాలిజో జోలాలిజో

గురువారం, మే 09, 2013

పుచ్చా పూవుల విచ్చే తావుల

తన అమ్మమ్మగారి ఊరైన కొల్లూరు(తెనాలి తాలూకా)లో మా కృష్ణవేణమ్మ అందాలకు ముగ్దుడై వేటూరి గారు రాసుకున్న ఈ అందమైన గీతాన్ని సినిమాలో కృష్ణానది లేకపోయినా సంధర్బానికి సమన్వయం చేసుకుంటూ గుణశేఖర్ చిత్రీకరించిన తీరు కూడా చూడ ముచ్చటగా ఉంటుంది. నాకు చాలా ఇష్టమైన పాట, విడుదలై ఇన్నాళ్ళయినా నేను తరచుగా వినే పాట, ఎన్నిసార్లు విన్నా బోర్ కొట్టని పాట ఇది.
ఆడియో మాత్రమే కావాలంటే ఇక్కడ వినండి.

ఈ పాట గురించి వేటూరి వారు కొమ్మకొమ్మకో సన్నాయి శీర్షికలో రాసుకున్న మాటలు ఇక్కడ చూడండి. ఈ ఫైల్ స్కాన్డ్ కాపీ అందించినందుకు ఫణీంద్ర గారికి ధన్యవాదాలు.
 

చిత్రం : మనోహరం
సాహిత్యం : వేటూరి
సంగీతం : మణిశర్మ
గానం : పార్థసారధి, చిత్ర

పుచ్చా పూవుల విచ్చే తావుల వెచ్చా వెన్నెలలూ
అచ్చామీగడలిచ్చే తీయన తెచ్చే నీ కలలు
వచ్చీనాయమ్మా విచ్చీనాయమ్మా
వచ్చీనాయమ్మా కలువలు విచ్చీనాయమ్మా

ముద్దా బంతులు ముని గోరింటలు మురిసే సంజెల్లో
పొద్దే ఎరుగని ముద్దే తరగని రస నారింజల్లో
వచ్చీనాయమ్మా విచ్చీనాయమ్మా
వచ్చీనాయమ్మా కలువలు విచ్చీనాయమ్మా

గువ్వ జంటలకు కువ కువ ఇటు కుర్ర గుండెలకు మెలకువ
వీణ మీటె సెలయేరూ చలి వేణువూదె చిరుగాలీ
కలువ కనులలోన కలవరింతలాయే
చలువ తనువులోన జలదరింతలాయే
ఓ..ఓ..ఓ..ఓ

పిండీ వెన్నెల వండీ వార్చిన వెండీ ఇసకల్లో
తెల్లా మబ్బులె వెల్లా వేసిన పిల్ల కాలువల్లో
వచ్చీనాయమ్మా వచ్చీనోయమ్మా
వచ్చీనాయమ్మా అలజడులొచ్చీనాయమ్మా

లేత పచ్చికల అణకువ నునులేత మచ్చికల కువకువ
నిండు అల్లికల నవనవ తలదిండు మల్లికల శివ శివ
పట్టపగటి ఎండా పండు వెన్నెలాయే
నిట్టనిలువు తపనే నిలువనీయదాయె
ఓ..ఓ..ఓ..ఓ

ఓరా వాకిలి తీసీ తీయని దోరా వయసుల్లో
మాఘా మాసపు మంచు బెబ్బులి పొంచే వేళల్లో
వచ్చీనోయమ్మా గిచ్చీనాయమ్మా
వచ్చీనాయమ్మా వలపులు గిచ్చీనాయమ్మా

పుచ్చా పూవుల విచ్చే తావుల వెచ్చా వెన్నెలలూ
అచ్చా మీగడలిచ్చే తీయన తెచ్చే నీ కలలు
వచ్చీనాయమ్మా విచ్చీనాయమ్మా
వచ్చీనోయమ్మా కలువలు విచ్చీనాయమ్మా

నేను ??

నా ఫోటో
గుంటూరు, ఆంధ్రప్రదేశ్, India
అర్ధంకానివాళ్ళకో ప్రశ్నార్థకం, అర్ధమైన వాళ్ళకో అనుబంధం. ఈ లోకంలో ఎందరో పిచ్చాళ్ళున్నారు. డబ్బు, పదవి, కీర్తి, కాంత, కనకం, ప్రేమ, సినిమా, మంచితనం, తిండి ఇలా ఎవరికి తోచిన పిచ్చిలో వాళ్ళు మునిగి తేలుతుంటారు. నేనూ ఓ పిచ్చోడ్నే.